14:41 На Валожыншчыне ад дыму задыхнуўся трохгадовы хлопчык

Днямі ў адной з хат вёскі Бабровічы Валожынскага раёна задыхнуўся ў дыме трохгадовы хлопчык. Як высветлілася ў выніку праверкі, у хаце ён знаходзіўся адзін і сам падпаліў венік, абутак і рэчы ля печкі.

Па словах бацькоў, каля 7 гадзінаў раніцы яны выправілі старэйшага сына ў школу, а самі пайшлі на працу.

Малодшага будзіць не сталі, бо ведалі, што праз некалі гадзінаў маці вернецца дамоў.

Калі жанчына аб 11 адчыніла дзверы ў хату, там было поўна дыму, а хлопчык ляжаў на ложку бацькоў скруціўшыся ў куточку.

Штучнае дыханне не дапамагло і дактары “хуткай” зафіксавалі смерць. Па жорсткай іроніі лёсу бацькі зусім нядаўна перавезлі сына да сябе жыць. Раней хлопчык гадаваўся ў бабулі і дзядулі ў Валожыне.

Зміцер Панямонаў, Еўрарадыё, Маладзечна