Аб завяршэнні прафесійнай кар'еры паведаміў паўабаронца БАТЭ Станіслаў Драгун

Аб завяршэнні прафесійнай кар'еры паведаміў паўабаронца БАТЭ Станіслаў Драгун. У канцы 2022-га ён трапіў у "чорны спіс" Мінспорту, і сёлета яму не дазволілі гуляць у беларускім чэмпіянаце.

Драгун аб'явіў пра сваё рашэнне ў дзень свайго 35-годдзя.

За сваю кар'еру Станіслаў Драгун паспеў пагуляць толькі ў клубах Беларусі і Расіі. Найбольш плённым было яго выступленне за БАТЭ ў 2017-2022 гадах — 49 галоў у 196 матчах (летась забіў 10 галоў і стаў найлепшым бамбардзірам каманды). У складзе нацыянальнай зборнай Беларусі правёў 68 матчаў, забіў 11 галоў.

"Драгун — больш чым знакавая фігура для нашай каманды", — пішуць барысаўчане. І яго ім сёлета вельмі не хапае.

У "чорны спіс" спартыўныя функцыянеры ўключылі футбалістаў, якія ў 2020-м на відэа сказалі "Мы супраць гвалту!", і ім гэтага не могуць дараваць. З імі ці скасаваныя, ці не заключаныя кантракты. Самым вядомым у спісе быў Станіслаў Драгун. 

Лёс спартсменаў, якіх за палітычную пазіцыю пазбавілі магчымасці займацца спортам, вырашае камісія па вяртанні палітуцекачоў, складзеная з сілавікоў і прапагандыстаў.