Аўтар скульптуры "Мінскі гарадавы" не супраць таго, каб да яе дакраналіся

Аўтар скульптуры "Мінскі гарадавы" Аляксандр Дранец не супраць, каб да гарадавога дакраналіся. "Божа мой, датыкайцеся, абы вандалізму не было. Як я магу інакш думаць?" — заявіў скульптар у каментары Радыё "Свабода".

Скульптура апошнім часам набыла шырокую вядомасць. Гэта адбылося пасля таго, як мінскі ліцэіст даў гарадавому аплявуху. Яго затрымалі міліцыянты, і падлетак, па іх словах, абсалютна добраахвотна папрасіў прабачэння ў скульптуры і супрацоўнікаў міліцыі. Пасля гэтага другі юнак апрануў шалік на гарадавога, што таксама не спадабалася міліцыянтам. А ў панядзелак, 19 лістапада, група дзяўчат прыйшла да скульптуры з пацалункамі — міліцыя спрабавала спыніць і гэтую акцыю.

Аляксандр Дранец уваходзіць у склад грамадскай рады пры Міністэрстве ўнутраных спраў з 2013 года. Пра сваю скульптуру ён тлумачыць: "Гэта мой падарунак музею гісторыі міліцыі. Гэта частка экспазіцыі музея. І яна ахоўваецца, як любая экспазіцыя".

Дарэчы, калектыў Еўрарадыё таксама сфатаграфаваўся каля скульптуры гарадавога. Фатаграфавацца міліцыя дазваляе.