Беларускае пасольства абураецца сустрэчай Ціханоўскай у Балгарыі
Марыя Габрыэль і Святлана Ціханоўская / twitter.com/GabrielMariya/
Беларускае пасольства абураецца сустрэчай Святланы Ціханоўскай у Балгарыі. Кіраўніца Аб'яднанага пераходнага кабінета Беларусі сустракалася з прэм'ерам і міністрам замежных спраў гэтай краіны. Напрыклад, з міністрам Марыяй Габрыэль гаворка ішла падтрымку палітвязняў, рэпрэсаваных у РБ і беларускіх добраахвотнікаў ва Украіне.
Габрыэль напісала пра сустрэчу з Ціханоўскай і змясціла фота з яе. "Балгарыя падтрымлівае справядлівыя памкненні беларускага народа да дэмакратычнай дзяржавы, заснаванай на вяршэнстве права і фундаментальных правах, — адзначае міністр. — ЕС прыкладае намаганні па падтрымцы ініцыятыў, накіраваных на дапамогу грамадзянскай супольнасці Беларусі".
У адказ на гэта пасольства РБ у Балгарыі заявіла, што Святлана Ціханоўская "не прадстаўляе Беларусь і яе народ". Падкрэслівалася, што агучаная падтрымка не патрэбная. Дыпламаты рэжыму Аляксандра Лукашэнкі заклікалі Балгарыю да "канструктыўнага дыялогу".
