Беларускія медыкі прыдумалі, як змагацца з фальшывай статыстыкай ад чыноўнікаў

Не маючы статыстыкі, мы не можам рабіць нейкіх рэальных прагнозаў і кіраваць сітуацыяй. Змены да лепшага магчымыя толькі пасля таго, як мы даведаемся, што насамрэч адбываецца ў сістэме аховы здароўя.

Пакуль жа мы элементарна не ведаем, колькі ў краіне засталося лекараў, таму што статыстыка альбо засакрэчаная, альбо проста адсутнічае. Сапраўдныя лічбы па захворванні беларусаў фальсіфікуюцца на ўсіх узроўнях. Менавіта таму наша задача сёння — максімальна апісаць сітуацыю і захаваць сабраную і апрацаваную інфармацыю ў сістэматызаваным выглядзе. Сёння ў нас ёсць для гэтага магчымасці.

Так, мы разумеем, што ўсё роўна атрымаем непаўнавартасную карціну, тым не менш, гэта значна лепш, чым нічога не рабіць. Мы просім грамадства, па магчымасці, дапамагчы нам.

— Як вы плануеце працаваць з інфармацыяй? Чым канкрэтна могуць дапамагчы людзі, якія працягваюць жыць у рэпрэсаванай краіне?  

— Умоўна кажучы, калі раней мы ўсё рабілі ручкамі, ацэньвалі на вока, падлічвалі на калькулятарах, цяпер можам дазволіць сабе аўтаматызаваць некаторыя працэсы апрацоўкі інфармацыі. Я не магу раскрываць усе дэталі, каб не падвесці праект пад пагрозу атак, але ў мяне вельмі вялікая надзея, што тая інфармацыя, якую збярэм, будзе сістэматызаваная і не страчаная.

А зараз пра тое, як можна дапамагчы. Калі вы пацыент, праходзілі лячэнне і ў вас ёсць пытанні, дашліце нам фатаграфіі эпікрызаў, сцёршы асабістыя дадзеныя свае і лекараў. Ад медработнікаў хочам інфармацыі аб сітуацыі на працоўных месцах. Цікава ўсё аб праблемах з працоўным правам, пра недахоп лекаў або абсталявання.

Нашая задача — не апублічыць гэтую інфармацыю прама цяпер, не тыцнуць некага, маўляў, глядзіце, тут лекары неяк няправільна аказалі дапамогу. Мы хочам ацаніць, што адбываецца ў краіне. І, можа быць, калі інфармацыі будзе дастаткова, атрымаецца аднавіць карціну, хоць бы з замахам на якуюсьці аб'ектыўнасць.

Са свайго боку скажу, што нашы каналы абароненыя. У праекце ўдзельнічаюць людзі, якім мы давяраем. Можам пахваліцца: за тры гады нейкага зліцця інфармацыі ад нас дакладна не было.

Мы выдатна разумеем, што бяспека зараз — гэта вельмі важна, але таксама лічым, што ведаць праўду неабходна.

Мы збіраем інфармацыю праз тэлеграм. Для гэтага створаны асобны акаўнт, доступ да якога ёсць толькі ў вельмі абмежаванага кола асобаў. Натуральна, усе яны знаходзяцца далёка-далёка за межамі Беларусі. Гэтыя людзі разумеюць, што такое кібербяспека і прытрымліваюцца усіх правілаў.

Для адпраўніка будзе дастаткова стварыць сакрэтны чат, нешта праз яго перадаць, чат выдаліць і пачысціць кэш. А да таго, што беларусы захоўваюць у гаджэтах эпікрызы, прычапіцца пакуль яшчэ цяжка нават у нашай краіне.

Яшчэ раз: усе сабраныя дадзеныя будуць аблічбаваныя, сістэматызаваныя, і на іх падставе мы правядзем аналіз і дадзім незалежную ацэнку сістэмы аховы здароўя Беларусі.

Інфармацыю пра тое, як бяспечна падзяліцца дадзенымі, вы знойдзеце на сайце Фонду медыцынскай салідарнасці.