Брамнік мінскага ХК “Дынама” Джэф Глас гатовы стаць беларусам
![Брамнік мінскага ХК “Дынама” Джэф Глас гатовы стаць беларусам](/sites/default/files/styles/gallery_main/public/2023-08/glass_2.jpg.webp?itok=pYGV0MPA)
Брамнік мінскага хакейнага “Дынама” Джэф Глас заявіў, што з задавальненнем прыме беларускае грамадзянства, каб выступаць за нацыянальную каманду. У сёлетнім сезоне 29-гадовы канадзец правёў 14 матчаў, у якіх атрымаў 6 перамог, у сярэднім за гульню прапускаючы па 2,51 шайбы. Каэфіцыент сэйваў склаў 91,6%.
У інтэрв’ю выданню “Р-Спорт” Глас сказаў, што ў Мінску ў яго толькі станоўчыя эмоцыі ад горада і ад каманды. “Бачу, што ўся Беларусь хварэе на хакей, тут кожны заўзятар ведае гульцоў у твар, на трыбунах заўсёды шалёная падтрымка, а атмасфера на матчах не саступае канадскай”, — сказаў ён.
Джэф Глас кажа, што калі яму прапануюць прыняць беларускае грамадзянства, ён напэўна пагодзіцца і для яго будзе вялікім гонарам згуляць за зборную Беларусі на чэмпіянаце свету.
Раней у 2011 годзе беларускае грамадзянства атрымалі трое канадскіх хакеістаў — Джэф Плат, Шарль Лінгле і Кевін Лаланд. У 2014 годзе ў Беларусі натуралізаваўся амерыканец Нік Бэйлен, а сёлета беларускі пашпарт атрымаў і ўкраінец Аляксандр Мацярухін.
Фота: TUT.by