Пракуратура лічыць прысуд журналістцы Кацярыне Барысевіч "занадта мяккім"

Прысуд быў абвешчаны ў судзе Маскоўскага раёна Мінска 2 сакавіка (сам працэс праходзіў у закрытым рэжыме). 36-гадовая Кацярына Барысевіч і 37-гадовы лекар Бальніцы хуткай медыцынскай дапамогі Арцём Сарокін былі прызнаныя вінаватымі ў "разгалашэнні медыцынскай таямніцы, што пацягнула цяжкія наступствы". Гаворка ідзе пра гучную справу забітага пратэстоўца Рамана Бандарэнкі. Барысевіч і Сарокін абнародавалі інфармацыю, што ён не быў п'яным — 0 праміле алкаголю ў крыві. А гэта супярэчыла афіцыйным заявам Следчага камітэта і Аляксандра Лукашэнкі.

Арцём Сарокін быў асуджаны на 2 гады калоніі з адтэрміноўкай пакарання на год. І гэты прысуд Генпракуратуру не абурыў. Тэрмін зняволення могуць павялічыць Кацярыне Барысевіч, якая знаходзіцца за кратамі з лістапада 2020 года.