Кадафі просіць Абаму, як "сына", спыніць бамбардзіроўкі
Муамар Кадафі напісаў прэзідэнту ЗША ліст з просьбай прыпыніць ваенную аперацыю НАТО ў Лівіі. Пра гэта 6 красавіка паведамляе Associated Press.
У тэксце дакумента, які трапіў у распараджэнне агенцтва, Кадафі просіць Барака Абаму спыніць "несправядлівую вайну супраць маленькага народа ў краіне, якая развіваецца". Акрамя таго, лівійскі лідэр называе прэзідэнта ЗША "сынам" і зычыць яму перамогі на прэзідэнцкіх выбарах 2012 года.
Па словах Кадафі, дэмакратыю нельга пабудаваць з дапамогай самалётаў і ракет. Акрамя таго, ён нагадаў, што, на яго думку, праціўнікі лівійскага рэжыму з'яўляюцца сябрамі тэрарыстычнай арганізацыі "Аль-Каіда".
