Кіраўнік Нацпаліцыі Украіны раскрытыкаваў ідэю адправіць паліцэйскіх на фронт

Кіраўнік Нацпаліцыі Украіны Іван Выгоўскі раскрытыкаваў прапанову адправіць 100 тысяч паліцэйскіх на фронт. Ён кажа, што мабілізаваць столькі людзей не атрымаецца.

"Некаторыя грамадзяне, дзяржаўныя служачыя, чыноўнікі кажуць, у Нацыянальнай паліцыі ёсць 250 тысяч паліцэйскіх, і прапануюць 100 тысяч адправіць на фронт, — гаворыць кіраўнік Нацпаліцыі. — Дзіўна, калі пра гэта заяўляюць не "канапавыя эксперты", а людзі, якія працуюць у дзяржаўнай сістэме і не ведаюць элементарных лічбаў".

Па словах Выгоўскага, 300 тысяч было ў часы "міліцыі", а сёння штатная колькасць Нацыянальнай паліцыі складае 120 тысяч чалавек. Але нават гэтай колькасці няма па факце — у сістэме не закрытыя каля 17,5 тысяч вакансій. Гэта значыць фактычна цяпер у паліцыі служаць усяго каля 100 тысяч чалавек, з якіх каля 20 тысяч жанчын.

Да таго ж паліцыя і так задзейнічана ў абароне Украіны, паліцэйскія гінуць у прыфрантавых населеных пунктах падчас расійскіх абстрэлаў. Тыя ж з іх, хто хацеў паехаць на фронт, атрымалі такую магчымасць: некалькі тысяч чалавек ваююць у складзе "Гвардыі наступу".