Магілёўца Алеся Сабалеўскага прызналі палітвязнем

Беларускія праваабаронцы прызналі магілёўца Алеся Сабалеўскага палітвязнем. Яны прыйшлі да высновы, што "рэальнымі падставамі крымінальнага пераследу... з’яўляюцца палітычныя матывы". Праваабаронцы патрабуюць спынення пераследу Сабалеўскага і яго вызвалення, як і іншых палітвязняў.

Алесь Сабалеўскі — былы блогер і журналіст, ужо некалькі гадоў ён працаваў у адным з магілёўскіх пунктаў пракату. За кратамі знаходзіцца з 12 снежня. Спачатку яго двойчы запар асудзілі на адміністрацыйны арышт (другі раз — "за распаўсюд экстрэмісцкіх матэрыялаў"), а пасля ўзнікла крымінальная справа. Нядаўна з ізалятара часовага ўтрымання Сабалеўскага перавялі ў магілёўскі следчы ізалятар. У чым яго абвінавачваюць, пакуль невядома. Паводле інфармацыі праваабаронцаў, крымінальны пераслед Алеся Сабалеўскага можа быць звязаны з нядаўнім прызнаннем "экстрэмісцкімі фармаваннямі" некалькіх рэгіянальных медыярэсурсаў Магілёўшчыны.

У Беларусі налічваецца больш за 1400 палітвязняў.