Міліцыя знайшла законны спосаб нейтралізаваць Вінаградава
Павел другі дзень запар “прафілактычна размаўляе” з супрацоўнікамі Маскоўскага РУУС. Адвакат нічога зрабіць не можа.
“Сяджу ў кабінеце. Расказваю пра сітуацыю з правамі чалавека ў Беларусі. А мне расказваюць розныя байкі. Пра бамжоў. Некаторыя скардзяцца пра недахоп канцылярскіх прыналежнасцяў”, — расказвае Еўрарадыё Павел Вінаградаў, седзячы ў кабінеце са старэйшым лейтэнантам Аляксеем Лістападавым.
На недахоп паперы міліцыянты скардзяцца Вінаградаву ў межах так званай прафілактычнай гутаркі. Згодна з законам міліцыянты могуць запрасіць да сябе ў госці любога. Прычым юрыст Павел Сапелка не раіць адмаўляцца.
“Тэарэтычна, калі права весці прафілактычнае мерапрыемства ў міліцыі ёсць, то адмовіцца ад яго азначае непадпарадкаванне законным распараджэнням”.
Пра працягласць прафілактычных гутарак пры гэтым у законе ні слова. Таму размаўляць з міліцыянтамі прыйдзецца столькі, колькі ім захочацца. Тут нават адвакат не дапаможа. Максімум, што ён зможа зрабіць, — паслухаць міліцыянтаў разам са сваім кліентам.
“Новаўвядзенне” значна спрашчае жыццё праваахоўнікам. Затрымліваць чалавека можна не больш чым на тры гадзіны. Затым прыходзіцца складаць пратакол і дасылаць справу ў суд. А тут ні табе лішніх паперак, ні назойлівых адвакатаў. Дастаткова прафілактычна паразмаўляць.
Фота zapraudu.info
