Мокры снег пакінуў без электрычнасці 50 населеных пунктаў у Іўеўскім раёне
Непагадзь на Гродзеншчыне / прэс-служба Мінэнерга
22 красавіка ў многіх рэгіёнах Беларусі адзначаецца паніжэнне тэмпературы і мокры снег.
На тэрыторыі Гродзеншчыны сёння назіраюцца моцныя ападкі і вецер парывамі да 17-20 метраў за секунду. У Іўеўскім раёне, як паведамляе прэс-служба Мінэнерга, без святла засталіся 50 населеных пунктаў, адключаныя 117 трансфарматарных падстанцый.
Адключэнні фіксаваліся таксама ў Воранаўскім раёне. Асноўнай прычынай называюць наліпанне мокрага снегу на дратах.
Над аднаўленнем электразабеспячэння працуюць 11 аператыўна-выязных брыгад з Ашмянаў і Ліды з выкарыстаннем спецтэхнікі. Пры неабходнасці да іх гатовыя далучыцца брыгады з іншых электрасеткавых філіялаў.
Як распавядала Еўрарадыё, некалькі дзён таму снегам засыпала паўночны ўсход краіны — Віцебск, Оршу, Магілёў.
