МЗС Беларусі адказаў на заяву ЕС: гэта зусім недарэчны ўчынак

18/02/2021 - 12:42

МЗС Беларусі адказаў на заяву заходніх дыпламатаў у абарону парваабаронцаў, журналістаў і прафсаюзных актывістаў. Афіцыйны Мінск лічыць, што гэта дыктат, непрыхаваны ціск і спроба ўмяшання ва ўнутраныя справы. Пра гэта ў каментары БЕЛТА заявіў начальнік упраўлення інфармацыі і лічбавай дыпламатыі-прэс-сакратар МЗС Беларусі Анатоль Глаз.

16 лютага ў Беларусі прайшлі ператрусы дома і на офісах у шэрагу актывістаў і журналістаў. На наступны дзень прэс-служба МУС паведаміла, што адбылося каля 90 ператрусаў. Падчас іх была забраная разнастайная літаратура (названая "пратэснай"), аргтэхніка, каля 80 тысяч долараў (у эквіваленце). У МУС заявілі, што яны шукаюць "крыніцы фінансавання пратэснай дзейнасці". Так у МУС называюць аплату штрафаў для асуджаных мірных пратэстоўцаў.

На гэтыя масавыя ператрусы прадстаўніцтва Еўрасаюза ад імя краін ЕС, прадстаўленых у Мінску, а таксама ад імя амбасадаў ЗША, Вялікабрытаніі і Швейцарыі выступіла з сумеснай заявай. Дыпламаты назвалі гэтыя дзеянні непрымальнымі і заклікалі афіцыйны Мінск спыніцца.

Прадстаўнік беларускага МЗС назваў заяву недарэчнай: "З пункту гледжання дыпламатыі, дый здаровага сэнсу ў прынцыпе, гэта можна трактаваць як зусім недарэчны ўчынак. Незразумела, каго нашыя калегі спрабуюць падмануць і за каго яны прымаюць беларусаў. На кожным куце дэкларуюць пазіцыю нібыта ў падтрымку незалежнасці нашай краіны, а на справе такімі вось крокамі паказваюць, што суверэнітэт Беларусі яны ні ў што не ставяць".

Глаз падкрэсліў, што ператрусы датычаць "фінансавых аспектаў, якія самым жорсткім чынам спыняюцца ў любой з краін — аўтараў заявы". Праўда, як адбывалася "фінанасаванне пратэстаў", калі пры кожным ператрусе ў сярэднім знайшлі менш за 1000 долараў, прадстаўнік МЗС не патлумачыў.

Ён абвінаваціў заходніх дыпламатаў у спробе паставіць сябе вышэй за праваахоўную і судовую сістэмы Беларусі. "Незразумела, на якой падставе дыпламаты гэтых краін вырашылі прымерыць на сябе вобраз Праметэя, уявіўшы сябе і кампетэнтнымі суддзямі, і пракурорамі, і экспертамі", — заявіў прэс-сакратар МЗС.

Заяву заходніх дыпламатаў ён ацаніў як умяшанне ва ўнутраныя справы Беларусі.

У лепшых савецкіх традыцыях Глаз параіў прадстаўнікам ЕС паглядзець на сябе: "Асабліва двудушна падобныя заявы выглядаюць на фоне тых працэсаў, якія адбываюцца ў цэлым шэрагу краін ЕС, уключаючы тое, што мы назіраем з учорашняга дня ў адной з іх".

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.