На 9 кастрычніка ў Беларусі абяцаюць моцныя дажджы

У нядзелю, 9 кастрычніка, на большай частцы тэрыторыі Беларусі зранку і ўдзень чакаюцца моцныя дажджы. У сувязі з гэтым у краіне абвешчаны аранжавы ўзровень небяспекі. Пра гэта агенцтву БЕЛТА распавялі супрацоўнікі Рэспубліканскага цэнтра па гідраметэаралогіі, кантролі радыеактыўнага забруджвання і маніторынгу навакольнага асяроддзя Мінпрыроды.

Чакаецца воблачнае і дажджлівае надвор'е. Магчымы слабы туман. Вецер будзе пераменных напрамкаў, умераны. На Віцебшчыне і Магілёўшчыне вецер уначы чакаецца парывісты, а ўдзень у некаторых раёнах — да моцнага.

Тэмпература паветра ўначы прагназуецца ад 1 да 8 градусаў цяпла, удзень будзе 7-13 вышэй за нуль.

У Мінску ўдзень абяцаюць +7...+9, моцны дождж. Вецер будзе паўночны, 4-6 метраў за секунду. Увечары ён зменіцца на паўночна-ўсходні, 6-8 метраў за секунду, парывамі да 11.