“Паеду ў Балгарыю па візу”: што рабіць беларусам, што трапілі ў юрыдычную пастку

Варыянтаў у гэтай сітуацыі і праўда няшмат. Знайсці працу і зрабіцца наёмным працаўніком, зарэгістраваць таварыства з абмежаванай адказнасцю замест ІП або зрабіць новую візу — але Польшча ўнутры краіны візаў не выдае.

— Адзіны варыянт, які магчымы — зрабіць паўторную візу за межамі Польшчы. Напрыклад, як я даведалася, без мясцовага віду на жыхарства дакладна прымаюць дакументы Балгарыя і Сербія. Я збіраюся ехаць у Балгарыю, бо ў мяне яшчэ ёсць дзеючая віза. Іншых надзейных варыянтаў няма. Паскорыць выдачу віду на жыхарства нерэальна, і ва Уроцлаве гэта сапраўды вельмі доўга. Можна, вядома, пісаць усякім упаўнаважаным па правах чалавека і прасіць паўплываць на ўжонд, але гэта такі спосаб — 50 на 50, можа дапамагчы, а можа і не, — дзеліцца сваім досведам беларуска з Уроцлава.

Юрысты кажуць, што даць нейкую ўніверсальную параду ў гэтай сітуацыі складана. 

— Нам складана кансультаваць без правядзення індывідуальных кансультацый з кліентамі. Вось чаму мы запрашаем іх на індывідуальную кансультацыю і прапануем звязацца з намі наўпрост, каб яны маглі зразумець сваю прававую сітуацыю. Візу Poland.Business Harbour немагчыма падоўжыць у Польшчы, і яе заканчэнне аўтаматычна не вядзе да немагчымасці працягваць працу, тым больш, калі асобы падалі дакументы на часовае пражыванне, — тлумачаць Еўрарадыё ў асацыяцыі мультыкультуральнай сацыяльнай інтэграцыі Nomada.

Кансультацыі на гэты конт даюць таксама ў арганізацыі АВВА — асацыяцыі беларускага бізнесу за мяжой.