Польшча адкрывае свой рынак працы для беларусаў

Чым гэта выклікана і ці кожны можа атрымаць працу ў Польшчы – высьвятляў наш карэспандэнт Алег Мілевіч у аналітыка рынку працы з „Gazety Wyborczej” Марка Вэльгі.

Алег Мілевіч: “Спадар Вэльга, чым было выкліканае такое рашэнне міністра працы?”

Марк Вэльга: “Адплывам польскіх працаўнікоў у краіны Заходняй Еўропы: пасля адкрыцця межаў шмат работнікаў, асабліва будаўнікоў, выехалі туды, дзе лепей плацяць. Таму ў Польшчы узнік недахоп работнікаў, і працадаўцы пачалі націскаць на ўрад, каб той дазволіў наймаць замежнікаў у Польшчу.

Найахвотней прынялі б суседзяў – беларусаў, расейцаў, украінцаў. Важна, што Міністэрства працы заявіла, што гэтыя палёгкі будуць датычыць не толькі будаўніцтва, але і ўсіх галінаў гаспадаркі.

Кожны працадаўца, які хацеў бы наняць, напрыклад, беларусаў, зможа запрасіць іх у Польшчу два разы па тры месяцы на год без усялякіх дазволаў і даплатаў. Умова адзіная: працадаўца дэкларуе, што прыняў на працу гэтую асобу”.

Алег Мілевіч: “А як беларусы даведаюцца пра такую прапанову – папрацаваць у Польшчы без бюракратычныз перашкодаў?”

Марк Вэльга: “Часам мы пра гэта нават не ведаем, але кантакты польскіх і беларускіх фірмаў існуюць здаўна. І як толькі з’явіцца такая магчымасьць, узнікнуць фірмы, якія будуць спецыялізавацца ў наборы працаўнікоў для польскага рынку працы.

Гэта ў нас ужо дзейнічае – фірмы робяць набор для Вялікай Брытаніі, Ірландыі, іншых краінаў Еўрасаюзу”.

Алег Мілевіч: “Ці ёсць верагоднасць, што гэтае распараджэнне не ўвойдзе ў жыццё?"

Макр Вэльга: "Якраз цяпер ідуць перамовы з прафсаюзамі ды арганізацыямі працадаўцаў, але міністэрства працы сцвярджае, што пытанне практычна ўжо вырашанае, і ў траўні гэтае распараджэнне міністра працы набудзе законную моц”.

На фота: Marek Wielgo.
Фота: Kamil Wróblewski / TOK FM