Помнік драўлянага дойлідства ў Магілёве знясуць дзеля новабудоўляў
Дарэвалюцыйны дом у Магілёве прызначылі пад знос / фота Аляксандра Капёнкіна з Фэйсбук-групы "Магілёў. Горад, які быў..."
У Магілёве дзеля новабудоўляў плануюць знесці драўляны дом №13 па вуліцы Яцыны разам з яшчэ некалькімі суседнімі будынкамі. Пра гэта пішуць у Фэйсбук-групе "Магілёў. Горад, які быў...".
Удзельнікі Фэйсбук-групы адзначаюць, што гэта самы дыхтоўны з усіх дарэвалюцыйных дамоў на гэтай вуліцы.
Дом №13 на вуліцы Яцыны — узор дарэвалюцыйнага драўлянага дойлідства. Адна з яго характэрных рысаў — франтоны, упрыгожаныя разьблёнымі элементамі, адзначае Reform. Знесці яго гарадскія ўлады запланавалі даўно. Прыкладна год таму мясцовыя жыхары нават пісалі петыцыю, каб захаваць драўляны будынак. Яны прапаноўвалі стварыць у Магілёве філію Беларускага дзяржаўнага музея народнай архітэктуры і побыту і такім спосабам выратаваць старадаўні дом. Але, мяркуючы па ўсім, гарадскія ўлады вырашылі іначай.
