Прэм’ера “Дзікага палявання” ў Лондане — гэта рэп, электроніка і слёзы гледачоў

15/09/2023 - 13:53

Паказ “Дзікага палявання караля Стаха” ў Лондане 14 верасня 2023 года

Паказ “Дзікага палявання караля Стаха” ў Лондане 14 верасня 2023 года / twitter.com/zmiecer

У лонданскім тэатры “Барбікан” працягваецца сусветная прэм’ера спектакля “Дзікае паляванне караля Стаха”. Яна праходзіць 14-16 верасня.

Некаторыя ўжо паспелі паглядзець працу Беларускага свабоднага тэатра паводле твора Уладзіміра Караткевіча. А прадстаўніца Аб’яднанага пераходнага кабінета па нацыянальным адраджэнні Аліна Коўшык наведае “Барбікан” увечары 15 верасня.

Еўрарадыё даведалася, што кажуць пра спектакль, як на яго збіраецца Аліна Коўшык і што некаторым не спадабалася.

“Паплакала”

Прадстаўніца Кабінета кажа, што гэта адна з самых галоўных культурных падзеяў года. Таму яна вельмі хацела быць на прэм’еры.

— Я атрымала запрашэнне ад Свабоднага тэатра. І вось цяпер ў Лондане. І здраджу вам цікавостку. Калі я прыляцела ў Лондан, то выпадкова сустрэлася з Андрэем Хадановічам, які напісаў лібрэта да оперы. Так што я ўжо ведаю, што гэта будзе вельмі моцна і цікава. Падрыхтаваная вельмі сучасная пастаноўка з элементамі электроннай музыкі, рэпу. То-бок гэта не класічная опера, да якіх мы прызвычаіліся. Але Свабодны тэатр ніколі не робіць класічных пастановак, гэта абсалютна ў іх стылі.

Спадар Андрэй здрадзіў мне, што не ўсе тэксты змясціліся ў оперу, якая будзе ісці больш за дзве з паловай гадзіны. Трэба было выразаць некаторыя цікавыя моманты, яны не ўвайшлі ў апошнюю версію спектакля. Але вельмі спадзяюся, што можна будзе пачытаць тое, што зрабіў спадар Андрэй. Ён расказаў, што будуць выдатныя эфекты — будуць лётаць вершнікі караля Стаха.

Прэм’ера “Дзікага палявання” ў Лондане — гэта рэп, электроніка і слёзы гледачоў

Артысты Беларускага свабоднага тэатра на прэм’еры 14 верасня / facebook.com/siarhei.padsasonny

Пакуль Аліна Коўшык у чаканні, адна з беларускіх эмігрантак паспела схадзіць на спектакль 14 верасня і сцісла падзялілася ўражаннямі ў твітары:

— Водгук будзе такі: паплакала, — піша карыстальніца пад нікам Актыўна-агрэсіўная.

Яшчэ аднаму карыстальніку твітара спадабалася, але ёсць пытанні, якія засмуцілі:

— Адзінае пытанне: чаму беларускую оперу на беларускай мове спяваюць украінцы/кі? — піша твітаранін Маленькі Зянон. — Люблю і падтрымліваю Украіну, але няўжо няма беларусаў? А калі рэальна няма, можна ж было паставіць не оперу (украінскія спевакі і спявачкі адпрацавалі цудоўна, акцэнту было амаль не чуваць).

Ці думаў я тры гады таму, што буду сёння ў цэнтры Лондана слухаць оперу на беларускай мове. Змяшаныя пачуцці, вядома, як бы і крута, але…

Як наведваць такую падзею: лук — беларускі, кампаньён — вядомы архітэктар

Аліна Коўшык на сустрэчы з беларусамі ў Лондане ў Скарынаўскай бібліятэцы. На футболцы ў Коўшык выява палітвязня Ігара Аліневіча / Аліна Коўшык

Але вяртаемся да Аліны Коўшык, якая расказала яшчэ некалькі цікавостак. Прадстаўніца Кабінета збіраецца на прэм’еру са сваім сябрам, архітэктарам Цзывай Со. Ён стаў аўтарам праекта царквы святога Кірылы Тураўскага і ўсіх святых заступнікаў беларускага народа ў Лондане.

Царква святога Кірылы Тураўскага і ўсіх святых заступнікаў беларускага народа / Аліна Коўшык

— Я іду сёння, дарэчы, таму што сёння — галоўная прэм’ера. І цікава, што перад самім спектаклем будзе дыскусія. Але я не ведаю, наколькі шмат туды людзей запрашалі.

Планы гучаць выдатна, а што на такое мерапрыемства апранаць?

— Мне вельмі хацелася, каб гэта было сугучна з творам Караткевіча, як я гэта сабе ўяўляю. Штосці простае, чорнае, але з элементамі беларускага дызайну. Думаю, што вельмі важна гэта паказваць. І такія мерапрыемствы — гэта выдатнае месца.

Таксама мы папрасілі Аліну Коўшык згадаць, калі яна чытала “Дзікае паляванне караля Стаха” і якія ўражанні ў яе былі.

— Мне пашчасціла вучыцца ў школе, калі мы чыталі і “Каласы пад сярпом тваім”, і “Дзікае паляванне караля Стаха”. І я памятаю, што мяне гэта вельмі ўразіла. Агулам я заўсёды любіла ў дзяцінстве гістарычную літаратуру, асбліва з элементамі дэтэктыву. Цяпер я перачытаць не паспела — паслухала аўдыёбук, каб згадаць розныя элементы твора.

А ўлюбёныя Караткевічавы творы Аліны Коўшык — гэта “Дзікае паляванне караля Стаха”, “Каласы пад сярпом тваім” і “Хрыстос прызямліўся ў Гародні”.

Пакуль яна чакала прэм’еры ў Лондане, паспела сустрэцца з беларускімі актывістамі.

— Я прыехала адсмыслова на прэм’еру, але ўчора ў мяне быў шэраг працоўных сустрэч. Сёння таксама сустрэчы з беларусамі, якія займаюцца прасоўваннем беларускай культуры і Беларусі. Таму брэйнштормінг, думаем, што можам рабіць цяпер, робім планы на наступны год, — падводзіць рысу прадстаўніца Аб’яднанага пераходнага кабінета.