Жанчыну, якая ў Белдзяржфілармоніі выгукнула "Слава Украіне!", арыштавалі

Жанчыну, якая ў Мінску ў Белдзяржфілармоніі выгукнула "Слава Украіне!", арыштавалі на 20 сутак. Ірыну Саланкову прызналі вінаватай у "несанкцыянаваным пікетаванні" і "непадпарадкаванні міліцыянтам" (яе заносілі ў аўтамабіль чатыры супрацоўнікі). Прапагандысты пішуць, што яна "падтрымлівае народ Украіны, а словы гэтыя, на яе думку, гэта "пажаданні росквіту Украіне".

Як пісала прапагандыстка Ксенія Лебедзева, "жахлівая правакацыя" адбылася ў Белдзяржфілармоніі 23 сакавіка пасля выступлення Луганскага тэатра, які прыехаў у Беларусь на гастролі з рок-операй "Распятае юнацтва" (пра падпольную арганізацыю "Маладая гвардыя"). Адна з глядачак выгукнула "Слава Украіне!". Прапагандыстка заклікала яе знайсці і пакараць, апублікавала фота і відэа.

Саланкову знайшлі і затрымалі на наступны дзень, 24 сакавіка, па месцы жыхарства. Завезлі ў Савецкі РУУС, далей быў суд.

У Беларусі пераследуюць за адкрытую падтрымку Украіны. Людзей неаднаразова кідалі за краты за публічныя лозунгі "Слава Украіне!".