Прэзентацыя на Еўрарадыё: трэк “O Boža Moj” ад гурта Akute
Магілёўцы Akute прэзентуюць на Еўрарадыё песню “O Boža Moj”.
“Гэты трэк запісаны пры ўдзеле амаль што нашага новага ўдзельніка гурта Арцёма Кузняцова (DJ Pryzma), — распавядае басіст Akute Раман Жыгараў. — Ён раней рабіў рэміксы на нашы песні, а цяпер паўдзельнічаў у асноўным запісе, адказваў за сэмплаванне, сінтэзатары, драм-машынку, карацей электроннае гучаннне”.
Па словах Ромы, будучы альбом Akute будзе меней рокавым а больш электронным. Песня “O Boža Moj” стане “адным з яго цэнтральных трэкаў” і дакладна адлюстроўвае новае гучанне гурта.
“Любы трэк, які зараз будзе выдавацца, а я так разумею, што да вясны мы прэзентуем яшчэ адну песеньку, будзе паказваць розныя бакі будучага альбома, — працягвае музыка. — Мы нават цяпер перапрацоўваем тыя трэкі, якія былі напісаныя ў рокавай аранжыроўцы, на больш… сінтэтычныя”.
Новы альбом Akute з’явіцца не раней за восень, але дакладных дат музыкі не называюць, каб не сурочыць.
Трэк “O Boza Moj” і іншыя новыя песні можна будзе пачуць на канцэртах Akute у рамках тура “Усё павернецца” (Usio Pavierniecca). 11 снежня ў клубе Re: Public (Мінск) адбудзецца прэзентацыя новай праграмы ў фармаце вялікага сольнага канцэрта Akute.
