Беларус абірае прэзідэнта ЗША: “Ужо папрасіўся з працы на ранак серады”

01/11/2024 - 09:09

Выбары ў ЗША / калаж Улада Рубанава, Еўрарадыё

Бізнес-аналітык у лагістыцы, беларус Дзяніс Баранаў галасуе на амерыканскіх выбарах. І ўжо адпрасіўся з працы на ранак серады — усю ноч з аўторка на сераду Штаты будуць лічыць галасы. Беларус расказаў Еўрарадыё, што адбываецца ў краіне напярэдадні фінала прэзідэнцкай гонкі.

“Знаёмыя хадзілі на мітынг Харыс, кажуць, было натхняльна”

Цяпер некаторыя штаты кшталту Вірджыніі і Пенсільваніі папросту заваленыя мерчам кандыдатаў. Ля шашы стаяць агітацыйныя шчыты, ля дамоў — плакаты, машыны ездзяць з налепкамі. Але спадар Дзяніс жыве ў сталіцы, і перадвыбарнай агітацыі вакол яго амаль няма. Бо Вашынгтон традыцыйна галасуе за Дэмакратычную партыю, вось кандыдаты і не моцна турбуюць горад з агітацыяй.

Іх задача — паўплываць на так званыя swing states (штаты, якія не вызначыліся). І можна не намагацца перацягнуць на свой бок адданых гульцоў іншай каманды. Вось тут мы падрабязна тлумачым, чаму.

— Затое ў нас ідзе даволі гучная бойка за рэферэндум наконт адкрытых праймэрыз і рэйтынгавага галасавання, супраць якога выступае кіраўніцтва мясцовай Дэмакратычнай партыі.

А ў аўторак быў вялікі мітынг з удзелам [Камалы] Харыс. Але я туды не хадзіў, бо да нас прыязджаў "Акіян Эльзы". Знаёмыя хадзілі, казалі, што было натхняльна, — расказвае беларус.

Спадар Дзяніс пераехаў у Штаты больш за 20 гадоў таму. Ён пільна сочыць за кампаніяй, бо ад яе вынікаў моцна залежыць замежная палітыка краіны. І шкадуе, што дэбаты сёлета атрымаліся “найнуднейшымі”.

— Бо абое кандыдатаў звярталіся да сваіх асноўных выбаршчыкаў. Трамп быў больш эмацыйны, а ў Харыс быў больш грунтоўны змест. Вельмі шкада, што быў толькі адзін раўнд дэбатаў кандыдатаў у прэзідэнты, — кажа наш суразмоўнік.

“Будуць святкаваць перамогу Харыс або жальбаваць праз перамогу Трампа”

Сам Дзяніс афіцыйна — незалежны выбаршчык. То-бок беспартыйны. Але звычайна ў прэзідэнцкіх кампаніях падтрымлівае дэмакратаў.

— [На прэзідэнцкіх выбарах] я галасаваў супраць ізаляцыі ЗША, за прынамсі нейкую падтрымку Украіны і супраць эканамічнай лухты накшталт мытаў [Дональд Трамп абяцае ўвесці мыты на шэраг імпартных тавараў — Еўрарадыё]. А на мясцовых выбарах я аддаў свой голас за незалежных кандыдатаў і "зялёных".

Асабіста спадар Дзяніс праз сваю палітычную пазіцыю сёлета ні з кім не пасварыўся. Але ведае людзей, якія цягам гэтага года праз палітычныя погляды перасталі размаўляць з сябрамі.

У дзень выбараў, 5 лістапада, у Вашынгтоне запланавана шмат вечарынаў, дзе можна будзе сачыць за ходам выбараў, кажа наш суразмоўнік.

— Я яшчэ не вызначыўся, з якімі сябрамі і дзе буду глядзець вынікі, але ўжо папрасіўся з працы на ранак серады на ўсялякі выпадак.

Калі вынікі стануць вядомымі адразу ўначы, то або будуць святкаваць перамогу Харыс, або жальбаваць праз перамогу Трампа. Пратэсты ў асноўным чакаюцца ў тых штатах, дзе людзі будуць нязгодныя з вынікамі.

Калі вы таксама плануеце правесці гэты дзень, назіраючы за амерыканскімі выбарамі — раім найперш азнаёміцца з гэтым матэрыялам Еўрарадыё. Вы даведаецеся, чаму ў Пенсільваніі зашмат мерча абаіх кандыдатаў, а ў Вашынгтоне яго няма. І чаму ў ЗША можна атрымаць большасць галасоў амерыканцаў — і ўсё роўна не перамагчы на выбарах.