Прэзідэнтка Еўрапарламента стала сімвалічнай хроснай беларускай палітзняволенай

Прэзідэнтка Еўрапарламента Раберта Метсола стала сімвалічнай хроснай беларускай палітзняволенай Паліны Шарэнда-Панасюк. Некалькі дзён таму Метсола наведала Офіс Святланы Ціханоўскай у Вільні. Падчас сустрэчы яна і паабяцала стаць сімвалічнай хроснай для аднаго з беларускіх палітвязняў. А 15 студзеня прэзідэнтка Еўрапарламента абвясціла, што стала хроснай Паліны Шарэнда-Панасюк.

"Сённяшняе рашэнне Раберты — яшчэ адзін доказ таго, што мы не адныя ў сваёй барацьбе, — кажа Ціханоўская. — Калі нехта з міжнародных партнёраў становіцца хросным хаця б для аднаго з нашых герояў, я адчуваю цеплыню ў сэрцы. Бо разумею: гэта яшчэ адзін гучны голас, які нагадвае ўсяму свету пра нашых герояў. Думаю, нашых палітвязняў страшыць адчуванне таго, што пра іх усе забылі. Нашая задача — кожным дзеяннем нагадваць ім пра тое, што мы памятаем і дамагаемся іх вызвалення".

Паліна Шарэнда-Панасюк — грамадская актывістка з Брэста, яе затрымалі ў студзені 2021 года, абвінавацілі паводле трох артыкулаў КК (за нібыта "гвалт і абразу" міліцыянераў, а таксама за "абразу Лукашэнкі") і прысудзілі да 2 гадоў пазбаўлення волі. Вясной 2022 года яе судзілі зноў — гэтым разам за "злоснае непадпарадкаванне патрабаванням адміністрацыі папраўчай установы". Дадалі яшчэ адзін год зняволення. Потым судзілі паводле гэтага ж артыкула паўторна і дадалі яшчэ год зняволення. Тады Паліна ў знак пратэсту супраць катаванняў у калоніі адмовілася ад беларускага грамадзянства.

Палітзняволеная трымаецца мужна. Рада БНР узнагародзіла Паліну Шарэнда-Панасюк медалём Ордэну Пагоні.