Рабаў: Зіма вяртаецца ў Беларусь

У Беларусь вяртаецца зіма. З пятніцы тэмпература паветра будзе на 1-3 градуса ніжэйшая за кліматычную норму, прагназуецца снег. Пра гэта ў Facebook паведаміў Дзмітрый Рабаў, начальнік службы гідраметэаралагічных прагнозаў Рэспубліканскага цэнтра па гідраметэаралогіі, кантролю радыеактыўнага забруджвання і маніторынгу навакольнага асяроддзя.

У аўторак уначы амаль па ўсёй Беларусі пройдзе мокры снег, удзень — толькі месцамі, пераважна ў Брэсцкай вобласці. У начныя гадзіны будзе ад мінус 4 да плюс 2 градусаў, у дзённыя — 2-7 градусаў са знакам плюс. У сераду, 16 сакавіка, толькі на Віцебшчыне магчымыя дажджы. Уначы будзе 2-8 марозу, удзень — 2-8 цяпла.

У чацвер прагназуюцца невялікія дажджы, на ўсходзе краіны — з мокрым снегам. Тэмпература паветра ўначы — ад мінус 3 да плюс 3 градусаў, удзень — 3-8 цяпла.

З пятніцы і да канца тыдня ў нашай краіне пахаладае. Амаль па ўсёй Беларусі пройдуць мокры снег і дождж. У начныя гадзіны будзе ад мінус 3 да 2 градусаў вышэй за нуль, у дзённыя — ад 0 да 6 цяпла. У суботу і нядзелю ўначы прагназуецца 1-8 марозу (пры праясненнях — да мінус 11), удзень — ад 3 градусаў ніжэй за нуль на Віцебшчыне да 4 цяпла на Брэстчыне. Месцамі пройдзе снег, мокры снег. Практычна па ўсёй краіне ўсталюецца снежнае покрыва вышынёй 1-5 см.