Разумны Paint і першы палёт на экапаліве — #IxНоравы

29/11/2023 - 15:08

Кароткі агляд міжнародных навін / @rubanau_collage

Праграма Paint ад Microsoft цяпер будзе маляваць за вас. У Фінляндыі ліквідуюць расійсую амбасаду. Адбыўся першы палёт на экапаліве. Пра гэта і не толькі — у нашым традыцыйным аглядзе міжнародных навін.

Paint са штучным інтэлектам

Кампанія Microsoft абвясціла пра запуск функцыі Cocreator для Paint у Windows 11. Графічны рэдактар стаў разумнейшы — ён можа зрабіць усю працу за вас!

З дапамогай гэтага новаўвядзення можна ствараць выявы па тэкставым запыце. Функцыянал генерацыі выяваў у Paint нічым не адрозніваецца ад Bing Image Creator і DALL-E у ChatGPT Plus, якія таксама працуюць на базе DALL-E 3.

Каб выкарыстоўваць гэтую функцыю, неабходна адкрыць пусты дакумент Paint, націснуць на кнопку Cocreator у правай частцы панелі наладак і напісаць словамі тое, што вы хочаце стварыць. Малюнкі атрымліваюцца добрымі. Таксама пры жаданні можна абраць адзін з даступных стыляў.

Для пачаткоўцаў у галіне генератыўных нейрасетак Microsoft падрыхтавала паэтапную інструкцыі па генерацыі малюнкаў у Paint.

Microsoft узялася за актыўнае развіццё Paint — з апошнім апдэйтам кампанія не толькі навучыла стандартны графічны рэдактар ствараць карцінкі па тэкставым апісанні, але і дадала папулярную функцыю для выдалення фону і слаёў у выявах.

У адрозненне ад Photoshop, графічны рэдактар Windows бясплатны, то-бок не патрабуе дарагіх падпісак. Але пакуль гэта функцыя даступная ў бэта-версіі Windows 11.

У Фінляндыі ліквідуюць расійскую амбасаду, але ёсць нюанс

Улады фінскага горада Турку выкупяць былы будынак расійскай генамбасады, а потым знясуць яго. Рашэнне аднагалосна прыняла гарадская рада.

Вядома, што муніцыпалітэт горада заплаціць 1,6 мільёна еўра за зямельны ўчастак плошчай 3500 квадратных метраў, на якім у 1974 годзе быў узведзены будынак плошчай 2000 квадратных метраў. На яго месцы узвядуць новы будынак, як мяркуецца — дзіцячы садок.

Разумны Paint і першы палёт на экапаліве — #IxНоравы

Та сама амбасада / РИА Новости

Папярэдне гарадскія службы павінныя ачысціць глебу ўчастка, бо ў пачатку 1900-х гадоў на гэтым месцы былі ліцейны і цынкавы заводы.

Паведамляецца, што рашэнне пра набыццё будуць выконваць незалежна ад яго юрыдычнай сілы: улады не будуць чакаць разгляду магчымых абскарджанняў.

Варта адзначыць, што закрыццё расійскага консульства ў Турку ўлады Фінляндыі анансавалі яшчэ ў ліпені 2023 года. Такія дзеянні былі адказам на высылку дзевяці фінскіх дыпламатаў з РФ і закрыццё генамбасады ў Санкт-Пецярбургу.

Фінскае генконсульства дапрацавала да 30 верасня, пасля чаго ўлады скасавалі дамову арэнды. Яго функцыі перадалі расійскай амбасадзе ў Хельсінкі, а сам будынак, які ўзводзіўся яшчэ для савецкай дыпмісіі, пасля ад'езду дыпламатаў старанна праверылі з удзелам паліцыі.

Першы палёт на экапаліве!

Boeing 787 Dreamliner брытанскай авіякампаніі Virgin Atlantic у аўторак здзейсніў першы трансатлантычны пералёт з Лондана ў Нью-Ёрк на экалагічным авіяцыйным паліве (SAF).

Паліва, на якім ажыццявілі пералёт, было зробленае на аснове адпрацаванага харчовага алею і тлушчаў жывёльнага паходжання з дадаваннем невялікай колькасці сінтэтычнай газы (яе вырабілі з адходаў кукурузы).

На борце "Рэйса100" знаходзіліся сам заснавальнік групы Virgin, сэр Рычард Брэнсан, міністр транспарту Вялікабрытаніі Марк Харпер, а таксама генеральны дырэктар Virgin Atlantic Шай Вайс. Ні пасажыраў з білетамі, ні грузу на борце не было.

У снежні мінулага года ўрад вылучыў кампаніі Virgin Atlantic мільён фунтаў стэрлінгаў на правядзенне паказальнага палёту з мэтай прадэманстраваць эфектыўнасць экапаліва і яго патэнцыял у справе зніжэння выкідаў у атмасферу двухвокісу вугляроду.

“Ніхто не думаў, што далёкамагістральныя лайнеры калі-небудзь змогуць лётаць на экалагічным авіяцыйным паліве, — сказаў перад вылетам Рычард Брэнсан. — Сёння мы спадзяёмся пасароміць скептыкаў і даказаць, што гэта магчыма. І як толькі мы гэта зробім, мы зможам сказаць вытворцам паліва: мы прадэманстравалі, што гэта магчыма, і калі вы дасце нам такое паліва, мы будзем яго выкарыстоўваць”.

На долю авіяцыйнай прамысловасці прыпадае ад 2 да 3 працэнтаў выкідаў у атмасферу парніковых газаў.

Пакуль авіярухавікі, якія працуюць на вадародзе або электрычнасці, не сталі рэальнасцю, галіна спрабуе апрабаваць віды паліва, зробленыя з адходаў або аднаўляльных відаў сыравіны.