Яблыкі ў краме каштуюць амаль як бананы
Беларускія яблыкі ў краме каштуюць 7600 рублёў, а сялянам плацяць за кілаграм ад тысячы.
“У краме цяпер можаце пабачыць, вядома, даражэй яблыкі сталі, утрая даражэй, чым летась”, - кажуць Еўрарадыё ў ААТ “Александрыйскае.
Пры гэтым супрацоўнік гаспадаркі спасылаецца на рост коштаў і курс долара, бо даражэе рэчыва, якім дрэвы бароняць ад паразітаў.
“У сабекошт яблыкаў закладаюцца сродкі абароны ад паршы, а гэтыя сродкі абароны раслінаў робяць за мяжой, яны закупаюцца за валюту, таму прывязка да долара, да еўра”.
Дэфіцыту беларускіх яблык у сталічных крамах няма. А вось прывазныя даражэй ледзь ні ў тры разы. Іспанскія і французскія каштуюць ад 20 да 24 тысяч. Таму беларускія яблыкі ў краме бяруць ахвотна, запэўніваюць мяне прадавачкі.
Так выглядаюць беларускія яблыкі ў "Радзівілаўскай" краме, што ў "Сталіцы".
Няўжо цана яблыкаў так вырасла толькі з-за сродкаў для барацьбы з паразітамі? - пытаемся ў пастаўшчыка садавіны “Савіт”.
“Імпартны тавар дыктуе кошты, бо няма сваёй вытворчасці ў дастатковай колькасці”.
А гэта ўжо яблыкі з Бразіліі, у "Радзівілаўскай" краме.
У насельніцтва яблыкі скупляюць танней. “Гроднахарчпрам” селяніну за адзін кілаграм яблыкаў дае толькі 13% ад цаны:
“На сёння мы пакупаем яблыкі па тысячы за 1 кілаграм”.
Аднак, у краме гэтыя яблыкі не з’яўляюцца, бо ідуць на віно, ці павідла.
За кілаграм якасных яблыкаў можна атрымаць нават 6 тысяч рублёў. “Белкаапсаюз” закупляе яблыкі на рэалізацыю, пасля адпраўляе ў крамы на продаж.
“Закупачная цана на яблыкі ад 3,5 да 6 тысяч. А яблыкі, якія апалі на зямлю ад 700 рублёў да 1,2 тысячы”.
Бананы ў Мінску на рынку можна набыць за 6 тысяч, ў краме за 8-9 тысяч, то бок амаль па такім жа кошце як айчынныя яблыкі.
