Салдата, які выпаў з акна казармы, вывелі з штучнай комы

Медыкі вывелі з штучнай комы радавога Андрэя Макаеда, які выпаў з чацвёртага паверха казармы ва Уруччы пад Мінскам. Маці 21-гадовага салігарчаніна Наталля Грыцкевіч распавяла Еўрарадыё, што яго стан крыху палепшыўся.

Андрэя Макаеда прызвалі ў беларускую армію восенню 2018-га. Ён служыў у 120-й асобнай механізаванай брыгадзе.

Раніцай 13 красавіка калегі знайшлі хлопца пад вокнамі казармы "з прыкметамі падзення з вышыні". Следчы камітэт пачаў крымінальную справу па ч.1 артыкула 145 КК — давядзенне да самагубства. У ваенным шпіталі, куды пасля здарэння даставілі Макаеда, яму зрабілі дзве аперацыі. У штучнай коме хлопец правёў больш за 10 дзён.