Скардзіна: Я была не ў цені Домрачавай, а на сваім месцы
![Скардзіна: Я была не ў цені Домрачавай, а на сваім месцы](/sites/default/files/styles/gallery_main/public/2023-08/2017-11-29t181554z_2070918794_rc1ee3be30c0_rtrmadp_3_biathlon-world.jpg.webp?itok=1A15sZ4e)
32-гадовая беларуская біятланістка Надзея Скардзіна, якая напярэдадні ўпершыню ў сваёй кар’еры перамагла на этапе Кубка свету (выйграла індывідуальную гонку на 15 км у Эстэрсундзе), знаходзіцца ў цэнтры ўвагі СМІ. У інтэрв’ю matchtv.ru Скардзіна не пагадзілася з журналістам, што яна была ў цені Дар’і Домрачавай (ва ўчорашняй гонцы яна была 14-й). “Ну, я і была другім нумарам у камандзе, — кажа Надзея. — Але не ў цені, а на сваім месцы. Адносіны да мяне былі адпаведныя вынікам”.
З перамогай Надзею Скардзіну павіншаваў Аляксандр Лукашэнка: “Твой яркі поспех, дасягнуты дзякуючы працавітасці і волі да перамогі, падарыў усім беларусам выдатныя хвіліны радасці і гонару за сваю краіну. Гэта тваё першае золата на этапах Кубка свету, якое дае камандзе надзею і ўпэўненасць у сваіх сілах у пачатку алімпійскага сезону”.
Дагэтуль найлепшым дасягненнем Надзеі было другое месца ў гонцы пераследу на этапе Кубка свету ў Антэрсельве ў студзені 2014-га. А ў лютым таго ж года на Алімпіядзе ў Сочы ў індывідуальнай гонцы Скардзіна ўзяла “бронзу” (Домрачава тады выйграла “золата”).
![Скардзіна: Я была не ў цені Домрачавай, а на сваім месцы](/sites/default/files/paragraphs/image/2017-11-26t165235z47400179rc1a49d90440rtrmadp3biathlon-world.jpg)