У Беларусі знізілася ўраджайнасць збожжа
Ураджайнасць збожжа ў Беларусі знізілася ў параўнанні з мінулым годам. Як паведамляе БелаПАН са спасылкай на дадзеныя Белстата, на 1 кастрычніка намалочана збожжа ў першапачаткова апрыходаванай вазе 7 мільёнаў тон пры сярэдняй ураджайнасці 33,2 цэнтнера з гектара. Белстат не прыводзіць дынаміку ў параўнанні з мінулым годам, аднак, калі параўнаць з апублікаванымі тады дадзенымі, збожжа сабрана менш на 1,9 млн тон, а ўраджайнасць знізілася на 6,5 цэнтнера з гектара.
Затое вырасла ўраджайнасць бульбы: на пачатак кастрычніка бульба прыбраная з 71,2% плошчаў, якія падлягаюць уборцы. Атрымана 686,6 тысячы тон, а ўраджайнасць складае 261 цэнтнер з аднаго гектара супраць 225 цэнтнераў ў папярэднім годзе.
Цукровыя буракі сабраныя з 39,5% плошчаў — валавы збор склаў 1 мільён 456 тысяч тон пры сярэдняй ураджайнасці 390 цэнтнераў з аднаго гектара (на 1 кастрычніка 2015 года — 269 цэнтнераў).
Гародніна прыбраныя з 56,3% плошчаў. Яе вытворчасць павялічылася на 15,6% у параўнанні з адпаведнай датай 2015 года, склаўшы 97,5 тысячы тон, ураджайнасць — 220 цэнтнераў з аднаго гектара (на 1 кастрычніка 2015 года — 178 цэнтнераў).
