У Гомелі аб'явілі завочны прысуд праваабаронцу Леаніду Судаленку
Леанід Судаленка пасля выхаду на волю / @viasna96
У Гомелі аб'явілі завочны прысуд праваабаронцу Леаніду Судаленку, які жыве за мяжой. Гэта 5 гадоў пазбаўлення волі ва ўмовах строгага рэжыму і вялізны штраф — 26 тысяч рублёў.
Гомельскі абласны суд (суддзя — Анатоль Сотнікаў) 17 чэрвеня прызнаў Судаленку вінаватым у "садзейнічанні экстрэмісцкай дзейнасці".
Леанід Судаленка — былы палітвязень. За кратамі быў са студзеня 2021 года. У лістападзе 2021-га яго асудзілі на 3 гады зняволення за тое, што ён дапамагаў рэпрэсаваным і іх сем'ям. Праваабаронца выйшаў на волю ў ліпені 2023-га, цалкам адбыўшы свой тэрмін, і праз два тыдні пакінуў Беларусь.
Пра тое, што на Судаленку ў Беларусі распачалі завочную крымінальную справу ў рэжыме "спецвытворчасці", стала вядома ў пачатку вясны сёлета.
