"У шорціках ты мне больш падабаешся". Канфлікт фізрука і школьніц у Мінску

Супрацоўніца ўпраўлення дапусціла, што гэта магло не быць дамаганнем з боку настаўніка.

— Можа, гэта быў жарт, а дзіця падумала нешта не тое. Якая там была сітуацыя? Цяпер дзеці могуць сказаць усё што заўгодна. У любым выпадку трэба разабрацца, было адзін раз ці доўжыцца ўжо даўно. Я б не стала чалавека адразу ж вінаваціць.

Паводле яе слоў, найлепшае выйсце ў гэтай сітуацыі — звярнуцца ў адміністрацыю школы.

— А пажадана — непасрэдна да дырэктара. Калі дырэктар не рэагуе і не прымае мер, тады прыходзьце да нас ва ўпраўленне, наша начальніца аддзела — вельмі пісьменны чалавек, яна ўсё вам растлумачыць, калі такія факты сапраўды мелі месца. Я вас выдатна як тату разумею, і ў гэтым праўда трэба разабрацца.

Пасля звароту ва ўпраўленне адукацыя раёна мусіць прайсці расследаванне, падчас якога, па словах работніцы аддзела адукацыі, будуць адбывацца гутаркі з адміністрацыяй, настаўнікам фізкультуры, дзяўчатамі і іх бацькамі.

— Але гэта ўсё будзе адбывацца вельмі далікатна, вы ж разумееце. І калі сапраўды будзе выяўленае датычнасць настаўніка да злачынства, мы будзем сігналізаваць у міліцыю, — сказала жанчына.
 

“Відавочна, што сучасная школа на кансенсус не нацэленая”

Гендарная даследчыца Ірына Сідорская не бачыць у гэтай гісторыі праяваў харасменту ці булінгу. На яе думку, сучасная беларуская школа апрыёры не дапускае якога-кольвек кансенсусу і нацэленая выключна на запалохванне.

— Я б у гэтым выпадку не выкарыстоўвала такія паняцці, як "булінг" і "харасмент". Я б казала пра тое, што сучасная беларуская школа абсалютна нячулая да таго факту, што ў свеце магчымыя і харасмент, і сексуальны гвалт з боку настаўнікаў у дачыненні да вучняў.

З гэтай гісторыі відаць, што школа не хоча вырашаць праблему без агрэсіі. Можна ж спакойна пагаварыць, зразумець адно аднаго, настаўнік мог папрасіць прабачэння, абмеркавалі б гэтую сітуацыю з дзецьмі. Відавочна, што сучасная школа на кансенсус не нацэленая, а хоча проста запалохаць і школьніц, і бацькоў.

Сідорская мяркуе, што злога намеру з боку настаўніка магло і не быць, магчыма, ён проста няўдала пажартаваў.

— Цалкам дапускаю, што гэта мог быць проста жарт. Я б не шукала тут крыміналу адразу ж. Падкрэслю яшчэ раз: на жаль, настаўнікі і настаўніцы ў беларускіх школах не разумеюць гэтых праблем. Яны не разумеюць, што так жартаваць нельга. У гэтым я ўпэўненая.

Паводле Ірыны Сідорскай, у сучасных школах неабходна размаўляць з настаўнікамі. І тлумачыць, што такія факты, як харасмент і сексуальны гвалт у дачыненні да непаўналетніх, існуюць.
 

“Такія сітуацыі — моцны стрэс для дзіцяці”

Псіхалагіня Таццяна Зарыцкая ўпэўненая, што каментар настаўніка фізкультуры мае сексуальны падтэкст і ўжо можа расцэньвацца як харасмент, а забарона пераапранацца — учынак, які адкідае ўсе сумневы.

— Настаўнік — гэта дарослы чалавек, у яго ёсць улада, вучаніца знаходзіцца ў падпарадкаваным становішчы, яна нашмат маладзейшая. Такія каментары, нават у жартоўнай форме, недапушчальныя ў сітуацыі, калі ўдзельнікі не роўныя.

Школа — гэта ўстанова, якая аказвае паслугі ў адукацыйным працэсе. І самае важнае, першарадная ўмова аказання гэтых паслуг — бяспека.

Бо калі магчымы прэцэдэнт, калі такія паводзіны настаўніка маюць месца, і школа заступаецца за яго, а не ставіць бяспеку і спакой дзяцей у прыярытэт, гэта ставіць пад сумнеў наогул усю сістэму адукацыі, — кажа Таццяна.

Яна ўпэўненая, што такія сітуацыі — моцны стрэс для дзіцяці. Напрыклад, калі даросламу чалавеку некамфортна ў адносінах ці ў калектыве, у яго ёсць магчымасць спыніць зносіны або змяніць працу. Дзіця ж не можа перастаць мець зносіны з настаўнікам.

Знаходжанне ў працяглым канфлікце з выкладчыкам выклікае дыстрэс і можа прывесці да негатыўных наступстваў, такім як адмова наведваць урокі, агрэсіўныя паводзіны ў дачыненні да членаў сям'і і аднакласнікаў, дэпрэсія, трывожны разлад, страх, злосць і пачуццё віны.

Паводле спецыялісткі, гэтыя негатыўныя наступствы можна перадухіліць, даўшы дзіцяці падтрымку і адчуванне бяспекі.