Украінская журналістка: “У вас пачуццё, што за табой увесь час прыглядаюць"

04/11/2011 - 18:01

Дзясятак украінскіх журналістаў з Кіева тры дні знаходзіліся з прэс-турам у Беларусі. Па якім прынцыпе адбіралі СМІ – незразумела, гэта быў выбар Амбасады Беларусі ў Украіне. Патрапілі і недзяржаўныя, і дзяржаўныя СМІ. Журналісты ні за што не плацілі. Жылі ў гатэлі “Вікторыя”, у аднамесных нумарах коштам 180 даляраў за суткі, харчаваліся ў рэстаранах, 140 даляраў за квіткі туды сюды аплацілі. Пасля прэс-тура журналістка незалежнага тэлеканала СТБ Яўгенія Мотрыч распавяла нам свае ўражанні. У Беларусі яна пабачыла завод МАЗ, Нясвіжскі замак, агракамбінат “Сноў”, цэнтр трансплантацыі органаў, Мінск-арэну, Нацыянальную бібліятэку.

У падобным нумары гатэля "Вікторыя" жыла Яўгенія і астатнія госці з Украіны

Мэту прэс-тура Яўгеніі не тлумачылі, але яна фармулюе яе сама.

Яўгенія Мотрыч: “Мэта, як я зразумела, была – паказаць, якая ёсць насамрэч Беларусь. Але як на мяне, усё было вельмі “паказушна”. Не тое, каб зусім ужо “пацёмкінская вёска”... Што мне паказваюць – я гэта бачу. Але маю сваю думку”.

Ці быў нейкі інструктаж для журналістаў?

Яўгенія Мотрыч: “Не было і не магло быць, напэўна. Яны разумелі, што мы – не мясцовыя СМІ. А калі б і быў які інструктаж – і што мне з гэтага?..”

Тым не менш, кажа Яўгенія, праграма была вельмі шчыльная і прадуманая – у тым плане, што цяжка было знайсці час, каб пабачыць ці зняць нешта “незапланаванае”.

Яўгенія Мотрыч: “Мы намагаліся, апроч таго, што нам паказвалі, здымаць і нешта сваё. Не ўсё нам удавалася, але намагаліся… Я думаю, што прынамсі мае сюжэты будуць аб’ектыўныя… Пагаварылі з украінскімі хакеістамі, якія прыехалі сюды працаваць. Пагаварылі з некаторымі эканамічнымі экспертамі, здымалі людзей на вуліцы, пабачылі кошты…”

Пра эканамічную сітуацыю ў Беларусі ўкраінцы начутыя.

Яўгенія Мотрыч: “Я так зразумела, што тое, што паказваюць па вашаму беларускаму тэлебачанню – гэта троху прыкрашана…”.

У Нясвіжскім замку журналістка, апроч прагляду асноўнай экскурсіі, паспела пагутарыць і з новым дырэктарам замка. Яна задавала яму пытанні наконт аднаўлення замка – чаму быў разбураны цэлы корпус, чаму зруйнавалі стары мост, знішчылі старую ляпніну – пра гэта Яўгенія знайшла дастаткова ў інтэрнэце, рыхтуючыся да паездкі.

Яўгенія Мотрыч: “Пагутарылі з дырэктарам Нясвіжскага замка. І ўсяму дрэннаму – руйнаванню будынка, руйнаванню маста – ён знайшоў тлумачэнне. Мусіць пажарная машына праехаць па мосце ў замак – па пажарнай бяспецы. Па старому не можа праехаць – значыцца, трэба новы збудаваць”.

Такім пабачылі Нясвіжскі замак украінскія журналісты

У клініцы, дзе трансплантуюць органы, украінскую журналістку зацікавіла незвычайная для іх асаблівасць – трансплантацыя органаў ад памерлых людзей.

Яўгенія Мотрыч: “У гэтай клініцы нам паказалі цікавую рэч: у іх трансплантуюць органы ад мёртвых людзей. У нас гэта забаронена заканадаўствам – у вас дазволена. Таму ўкраінцы едуць да вас. Гэта цікава з выгляду нашай сітуацыі, бо ў нас быў скандал з “чорнай трансплантацыяй”.

Пра трактары “Беларусь” Яўгенія Мотрыч чула і дагэтуль, іх хапае ва Украіне. Але пабачанае ў Мінску журналістку ўразіла і насмяшыла.

Яўгенія Мотрыч: “Дужа смяялася, калі пабачыла, што ў вас ёсць трактары на вуліцах, якія з міргалкамі – і якія займаюцца эвакуацыяй аўтамабіляў! Такое ўражанне, што накляпалі столькі трактароў, што ўжо выкарыстоўваюць іх і не па прызначэнню”.

Трактары з міргалкамі насмяшылі ўкраінцаў. Фота http://evakyator.by

Якое агульнае ўражанне засталося ў незалежнай украінскай журналісткі ад афіцыйнага трохдзённага прэс-тура ў Беларусь?

Яўгенія Мотрыч: “Напраўду, такое адчуванне, што за табою ўвесь час… Гэта маё суб’ектыўнае пачуццё – што за табою пастаянна наглядаюць. Магчыма, гэта мае стэрэатыпы – што я ведаю пра Беларусь, пра колькасць спецслужбаў…”