Вакцына ад раку лёгкіх і барацьба з вуаерызмам — #ІхНоравы

22/03/2024 - 16:02

Замежныя навіны / @rubanau_collage

Вакцыне ад раку лёгкіх — быць. Навукоўцы ўжо актыўна працуюць над гэтым. Тым часам у нямецкім парламенце таксама сенсацыя — сярод дэпутатаў упершыню за ўсю палітычную гісторыю з’явіўся глухі чалавек.

Чаму трэба звяртаць увагу на цацкі, якія мы набываем сваім дзецям, і як у Японіі змагаюцца з вуаерызмам падчас школьных спартыўных мерапрыемстваў, чытайце ў нашым традыцыйным аглядзе замежных навін “Іх норавы”.

Хайке Хойбах стала першай глухой дэпутаткай бундэстага

У чацвер, 21 сакавіка, дэпутатка ад Сацыял-дэмакратычнай партыі Германіі Хайке Хойбах упершыню ўзяла ўдзел у пленарным паседжанні. Калегі па бундэстагу віталі яе апладысментамі, як гучнымі, так і бязгучнымі — выкарыстоўваючы мову жэстаў. У парламенцкай гісторыі Германіі яшчэ не было такога, каб сярод дэпутатаў быў глухі чалавек.

44-гадовая Хойбах прадстаўляе Баварыю, дакладней — горад Аўгсбург і яго ваколіцы.

— Нарэшце я змагла прысутнічаць на дэбатах ужывую — не здалёк па тэлевізары, а па-сапраўднаму. Быць у цэнтры ўсяго гэтага — асаблівае і захапляльнае адчуванне, — адзначыла Хайке Хойбах.

Падчас працы дэпутатку суправаджае сурдаперакладчык.

— Гэтая схема працуе вельмі добра. За кароткі час мы сталі зладжанай камандай. Перад перакладчыкам пастаўленая задача перакладаць абсалютна ўсё, і я вельмі разлічваю на яго.

Каб сурдаперакладчык быў заўсёды побач, за дэпутаткай замацаванае пастаяннае месца.

Хопіць сексуалізаваных здымкаў — заўзятаркі надзелі шорты

Сярэднія школы, якія ўдзельнічаюць у штогадовым вясновым турніры па бейсболе ў Японіі, робяць захады, каб перашкодзіць гледачам рабіць сексуалізаваныя фотаздымкі дзяўчат-заўзятарак.

Турніры, якія праводзяцца кожнае лета на стадыёне Кашыен недалёка ад Осакі — своеасаблівае свята юнацкага спартыўнага майстэрства і шанец для хлопчыкаў-падлеткаў з 32 школ па ўсёй краіне пачаць прафесійную бейсбольную кар'еру.
Але апошнія гады падзеі былі азмрочаныя выпадкамі вуаерызму, калі дзяўчат з груп падтрымкі, часта адзетых у топы без рукавоў і кароткія спадніцы, фатаграфавалі без іх згоды і нават публікавалі некаторыя здымкі ў інтэрнэце.

— Вуаерысцкія фота патэнцыйна могуць нанесці эмацыйную шкоду нашым вучаніцам на ўсё жыццё, — непакоіцца японскі настаўнік Такасакі Кохей Сіадзава.

Каб звярнуць увагу на праблему і вырашыць яе, заўзятаркі з некалькіх школ цяпер выступаюць на трыбунах у кашулях з доўгімі рукавамі і шортах, хаця іншыя школы захавалі традыцыйную форму.

— Спачатку я думала, што ў спадніцы будзе лепш, але калі надзела шорты і пачала заўзець, то адчула нейкую кансалідацыю з камандай, паколькі адзенне адпавядала форме спартоўцаў. Таксама ў шортах лягчэй перамяшчацца. Цяпер я магу танчыць са спакойнай душой, — падзялілася ўражаннямі кіраўніца школьнай групы падтрымкі Айры Одзава.

Небяспечныя цацкі ў Чэхіі

На чэшскім рынку ёсць небяспечныя цацкі, шмат з якіх утрымліваюць небяспечныя таксічныя элементы. Інспектары праверылі амаль 900 з іх летась і знайшлі недахопы ў 500.

Не адпавядаюць крытэрам і могуць быць небяспечнымі, напрыклад, паліцэйская машына, піяніна і гульнявая прыстаўка.

— Утрыманне свінцу дапускаецца ў межах 0,1%, а гэтыя цацкі ўтрымліваюць 60, 70 і больш адсоткаў свінцу ў паяных злучэннях. Склад кадмію таксама моцна перавышае норму, — тлумачыць прадстаўнік Чэшскай гандлёвай інспекцыі Францішак Котрба.

З 22 цацак на батарэйках, правераных летась, толькі дзве адпавядалі стандартам. Агулам інспектары праверылі 1997 розных мадэляў. У больш за тысячы з іх ёсць недахопы.

Котрба адзначыў, што ў некаторых цацак інспектары таксама выявілі недахопы адміністрацыйнага характару. Напрыклад, адсутнічала абавязковая маркіроўка ці іншая інфармацыя, інструкцыі ці папярэджанні для спажыўцоў.

Вакцына ад раку лёгкіх і барацьба з вуаерызмам — #ІхНоравы

Асцярожна, небяспека! / pixabay.com

Вакцыне ад раку лёгкіх — быць

Каманда навукоўцаў з Вялікабрытаніі пачала распрацоўку першай у свеце вакцыны ад раку лёгкіх. Яна зможа прадухіляць да 90% выпадкаў захворвання.

Даследчыкі абралі тэхналогію, якую выкарыстоўвалі пры стварэнні вакцыны Oxford-AstraZeneca супраць COVID-19. Новы прэпарат павінен навучыць імунную сістэму распазнаваць неаантыгены ў клетках раку лёгкіх і знішчаць іх.

Каманда атрымала фінансаванне ў памеры да 1,7 млн. фунтаў стэрлінгаў ад дабрачынных арганізацый для вытворчасці 3000 доз вакцыны.

— Навука, якая паспяхова вывела свет з пандэміі, неўзабаве можа прывесці нас да будучыні, дзе людзі будуць жыць даўжэй і лепш, не асцерагаючыся раку, — заявіла Мішэль Мітчэл, выканаўчая дырэктарка Cancer Research UK.

Калі вакцына прадэманструе эфектыўнасць у лабараторных умовах, вучоныя змогуць перайсці да клінічных тэстаў. Станоўчыя вынікі на гэтым этапе адкрыюць шлях да больш маштабных выпрабаванняў на людзях з высокай рызыкай захворвання.