За данат 1,78 еўра айцішнік з Гродна "ахвяраваў" дзіцячаму фонду 1000 долараў
Гродзенскіх айцішнікаў прымусілі плаціць "адкупныя" за данаты
Сілавікі апублікавалі відэа з трыма гродзенскімі айцішнікамі. Сілавікі заявілі, нібыта тыя самі прыйшлі з пакаяннем пасля данатаў Nexta і фонду BYSOL, заўважыў праваабарончы тэлеграм-канал "Право имеют".
Адзін з айцішнікаў, як паведамляецца, перавёў Nexta 1,78 еўра праз PayPal. Для "кампенсацыі шкоды" ён перавёў на рахунак дзіцячага фонду 1000 долараў.
Другі таксама адправіў данат Nexta праз PayPal у 2021 годзе. Ад яго на "дабрачыннасць" пайшло 5000 долараў.
Інжынер-праграміст адправіў для фонду BYSOL два данаты на 35 еўра. Мужчына заявіў, што сам прыйшоў у міліцыю і за "сваю правіннасць" перавёў 5000 долараў у фонд дапамогі хворым дзецям.
У Беларусі неаднаразова паведамлялася, што з людзей, якіх сілавікі злавілі на данатах "экстрэмістам", патрабуюць заплаціць "адкупныя". Праўда, гэта не заўсёды выратоўвае ад крымінальнай справы.
