Затрымалі абаронцу Курапатаў рэжысёра Аляксея Туровіча

У Мінску 12 чэрвеня міліцыянты затрымалі рэжысёра Аляксея Туровіча — аднаго з абаронцаў Курапатаў. Пра гэта ў каментары Радыё "Свабода" паведаміў адзін з кіраўнікоў аргкамітэта БХД Павел Севярынец. 

Па яго словах, Туровіча затрымалі пасля завяршэння акцыі ў абарону Курапатаў на вуліцы Карбышава. Мужчыну зацягнулі ў міліцэйскую машыну і павезлі ў пастарунак. Прычыну затрымання міліцыянты не патлумачылі.

Аляксей Туровіч — аўтар фільму "Жоўты пясочак" паводле твору Васіля Быкава. Стужка прысвечаная акурат расстрэлам у Курапатах. Туровіч таксама актыўна ўдзельнічае ў пратэстах супраць рэстарана "Поедем поедим" каля Курапатаў.