Жыхарка Маладзечна спрабавала абмяняць фальшывыя 100 еўра з сэканд-хэнда
61-гадовая жыхарка Маладзечна спрабавала абмяняць у банку 100 еўра, але банкнота аказалася падробкай. Спачатку падазрэнні ўзніклі ў банкаўскай супрацоўніцы, а пасля гэта засведчылі эксперты. Як паведамляе прэс-служба міліцыі Мінскай вобласці, жанчына сцвярджае, што знайшла грошы ў штанах, якія купіла некалькі гадоў таму ў сэканд-хэндзе.
Крымінальную справу распачалі па артыкуле "Выраб, захоўванне альбо збыт падробленых грошай або каштоўных папер".
Пазней міліцыя ўдакладніла, што справу пачалі ў дачыненні асобы, якая вырабіла фальшыўку. Але асоба зламысніка невядомая. А ў дзеяннях жанчыны складу злачынства няма.
