Бацькі распавялі пра сына, затрыманага за напад у школе ў Стоўбцах

"Міліцыя ачапіла іншы дом, але сына там не было, — распавядае маці Аксана М. — Яго не ў пад’ездзе затрымалі. Ён сам падышоў і здаўся. Ён не ўцякаў".

Па словах бацькі, які быў на трохгадзінным допыце сына, той адмаўляецца даваць паказанні, адказвае толькі, што нічога не ведае ці не памятае. "Я не пазнаў сына, ён увесь збялелы быў", — кажа мужчына.

Вадзім распавёў бацьку, што калі амапаўцы зацягнулі яго ў мікрааўтобус, яны паклалі на падлогу, сталі нагамі на спіну і пачалі заломваць рукі. "З яго выбівалі паказанні, — мяркуе Віталь М. — Усё, што яны патрабавалі, ён гаварыў. Але сінякоў у яго не было. Сталі так, каб не было".

Бацькі паказалі журналістам пакой сына. Яны кажуць, што ў апошнія дні нічога незвычайнага за сынам не заўважалі. Вадзім рэдка куды хадзіў пасля школы, у асноўным быў дома. Бацька сцвярджае, што ў школе на паводзіны сына не скардзіліся. Быў толькі выпадак у восьмым класе, калі Вадзіма ў прыбіральні збілі іншыя школьнікі. Што да цяперашняга стану хлопца, то Віталь М. кажа, што ён фізічна моцны, "мог 100 разоў падцягнуцца". Бацькі адмаўляюць, што іх сын піў і курыў. Ён добра вучыўся. Збіраўся стаць адвакатам.

"Ён казаў, што хоча людзей абараняць, — распавядае Аксана М. — А на пракурора не хацеў, хацеў вызваляць людзей, а не саджаць".

Хлопец любіў чытаць, і чамусьці асабліва энцыклапедыі па анатоміі.