БАЖ адзначылі прэміяй Усходняга партнёрства
Дыплом лаўрэата прэміі Форуму грамадзянскай супольнасці Усходняга партнёрства / baj.by
Беларуская асацыяцыя журналістаў стала лаўрэатам прэміяй Форуму грамадзянскай супольнасці Усходняга партнёрства. Узнагароджанне адбылося напярэдадні ў Брусэлі, пра гэта распавялі ў БАЖ.
Прэмія існуе з 2018 года. Штогод яе ўручаюць "за выдатную і самаадданую працу арганізацый грамадзянскай супольнасці, якія паслядоўна абараняюць фундаментальныя дэмакратычныя прынцыпы". У абгрунтаванні ўручэння прэміі БАЖ гаварылася, што прыхільнасць беларускіх журналістаў "прасоўванню свабоды выказвання меркаванняў і незалежнай журналістыкі ў Беларусі заслугоўвае захаплення".
На ўзнагароджанне БАЖ адрэагавалі і ў Аб'яднаным пераходным кабінеце. Прадстаўнік па замежных справах кабінета Валерый Кавалеўскі адзначыў, што "мужная праца беларускіх журналістаў ва ўмовах беззаконня і рэпрэсій атрымала належнае прызнанне і ацэнку".
