Брэст замарозіў партнёрскія адносіны з галандскім Кувордэнам
Улады Брэста замарожваюць адносіны з галандскім горадам-пабрацімам Кувордэнам. Пра гэта ў сваім тэлеграм-канале напісаў кіраўнік Брэста Аляксандр Рагачук.
Рашэнне прынятае гарадскім саветам дэпутатаў.
Пабрацімскія адносіны з Кувордэнам Брэст усталяваў у 2000 годзе. Але пасля выбараў 2020-га нешта пайшло не так...
"На жаль, у апошнія паўтара года кіраўніцтва горада-пабраціма спрабавала выйсці за рамкі дзеючага двухбаковага пагаднення, распачаўшы шэраг недружалюбных крокаў, уключаючы "замарозку партнёрскіх адносін з афіцыйным Брэстам".
У выніку — толькі што на сесіі гарадскога савета дэпутатаў прынята адказнае рашэнне", — напісаў Рагачук.
Уладам Кувордэна ён паабяцаў накіраваць адпаведнае паведамленне бліжэйшым часам.
Пасля выбараў 2020-га года Брэст праславіўся самым масавым палітычным судовым працэсам — "карагоднай справай". За танцы і спевы ў цэнтры горада пад суд трапілі некалькі соцень чалавек. Суды над некаторымі працягваюцца дагэтуль.
