Еўрапейскія дыпламаты прыйшлі да будынка суда, дзе разглядалі справу палітвязняў
Дыпламаты каля будынка суда ў Мінску / https://www.facebook.com/posolstvogermaniiminsk/
19 ліпеня прадстаўнік амбасады Германіі ў Беларусі, а таксама супрацоўнікі дыппрадстаўніцтваў іншых краін прыйшлі да будынка суда Ленінскага раёна Мінска, дзе пачалі разглядаць справу палітвязняў Валерыі і Дзмітрыя Баяровічаў. Такім чынам яны выказалі з імі салідарнасць.
Прэс-служба амбасады Германіі адзначае, што Баяровічы "карысталіся сваімі правамі на свабоду сходаў і свабоду слова", а абвінавачванні супраць іх "несправядлівыя і маюць палітычныя матывы". Іх судзяць за ўдзел у паслявыбарчых пратэстах. Падкрэсліваецца, што федэральны ўрад Германіі патрабуе вызвалення палітзняволеных у Беларусі (іх налічваецца амаль паўтары тысячы).
Дзмітрый Баяровіч раней працаваў на дзяржаўным тэлеканале СТБ, але ў 2020-м звольніўся ў знак пратэсту супраць гвалту ў дачыненні да ўдзельнікаў мірных акцый. Баяровіча разам з жонкай затрымалі ў сакавіку сёлета.
Беларускія праваабаронцы прызналі Дзмітрыя і Валерыю Баяровічаў палітвязнямі.
