Месцы, дзе ваяру дапамогуць вярнуцца да мірнага жыцця. Гайд па Варшаве

Беларускія добраахвотнікі вяртаюцца з вайны, і часта менавіта Варшава робіцца месцам, дзе яны спрабуюць пачаць новае жыццё. Калі ваша новае жыццё ўсё ніяк не пачнецца, паглядзіце наш гайд — магчыма, у ім ёсць месцы і людзі, якія вам дапамогуць.

Калі ваша ініцыятыва гатовая дапамагчы беларускім добраахвотнікам, якія вяртаюцца з вайны, але не трапіла ў гэты гайд, напішыце нам.

Жыллё

“Мірны  дом”

Дзе гэта? Людзей прымаюць ужо ў трох "Мірных дамах". Два з іх — у Варшаве, яшчэ адзін — у прыгарадзе Надажын.

Прыватны польскі фонд Humanosh адкрыў "Мірны дом" (шэлтар), дзе добраахвотнікі могуць спыніцца на адзін месяц. Але тэрмін знаходжання можа быць прадоўжаны.

Звяжыцеся з валанцёрамі, каб прайсці верыфікацыю. Лепш зрабіць гэта да прыезду ў Польшчу. Працэс можа заняць ад некалькіх гадзін да некалькіх сутак. Перад прыездам абавязкова ўдакладніце, ці ёсць у доме месцы.

Кантакты для верыфікацыі: Partyzanka і фонд Humanosh.

Шэлтар  на Балотнай

Дзе гэта? Варшава, вул. Błotna 18

Неяк перад самым Новым годам у дзверы двухпавярховага катэджа ў адным са спальных раёнаў Варшавы пагрукаў баец ПКК. Яго пусцілі пераначаваць, але... з умовай, што каліновец на адзін вечар зробіцца Дзедам Марозам. У асноўным тут жывуць мамы з дзецьмі, уцекачы ад вайны або рэпрэсій. Але ў адным пакойчыку на першым паверсе могуць нядоўга пажыць і мужчыны.

Каб спыніцца ў шэлтары, пішыце адміністратарцы Ганне Федарэнка наўпрост. Кантакты тут.

Агенцтва нерухомасці з беларускімі каранямі

Тут таксама абяцаюць бясплатна дапамагчы з жытлом на першы час. Пішыце, напрыклад, у тэлеграме.

Асацыяцыя  беларускіх  добраахвотнікаў

Калі не атрымся знайсці месца ў шэлтары, напішыце сюды. Фінансавання ў асацыяцыі няма, але яны дапамогуць знайсці жыллё на першы час.

Легалізацыя

Адно акно

Увогуле не ведаеце, з чаго пачаць? Для беларусаў запрацавала служба "Адно акно" ад Кабінета Святланы Ціханоўскай. Мэтавая аўдыторыя службы галоўным чынам — беларусы ў Беларусі, але і за мяжой дапамогуць. Можаце напісаць сюды, і вам падкажуць, што рабіць. Ці тэлефануйце: кансультанты працуюць кожны дзень с 12:00 до 20:00 па мінскім часе. Яны дапамагалі нам збіраць гэты гайд.

Partyzanka

Хутчэй за ўсё з "Аднаго акна" вас накіруюць менавіта сюды. На "Партызанскай інфалініі" вам дадуць індывідуальную юрыдычную кансультацыю. Кантакты тут.

Валанцёры дапамогуць сабраць дакументы на міжнародную абарону, атрымаць польскі праязны дакумент, калі ў вас скончыўся пашпарт, і падацца на інтэграцыйную праграму (IPI).Падрабязны гайд ад Partyzanka па легалізацыі беларускіх добраахвотнікаў у Польшчы шукайце тут.

Цэнтр  беларускай  салідарнасці

Сюды можна звярнуцца і па юрыдычную дапамогу, і па дапамогу з пошукам жылля. Вось тут вы можаце знайсці падрабязны гайд па атрыманні міжнароднай абароны, які падрыхтавалі юрысткі цэнтра. Або напішыце сваё пытанне ў бот, там адказваюць (мы праверылі).

Адукацыя

Прастора “Робім разам”

Дзе гэта: Варшава, plac Konstytucji, 6

Тут ёсць бясплатныя курсы польскай мовы ўзроўняў А1 і В1. Заняткі вядуць валанцёры з Польшчы і Украіны. Можаце проста прыйсці па адрасе — вас сарыентуюць на месцы. Або тэлефануйце: +48 573 202 950.

Моладзевы хаб

Дзе гэта: Варшава, ul. Dożynkowa 6A

У аўторкі тут праходзіць мерапрыемства "Czytam z Tobą". Беларусы чытаюць дзіцячыя польскія кнігі разам з польскімі філолагамі і такім чынам вучаць польскую мову і знаёмяцца адно з адным. Можна гаварыць на польскай, беларускай і рускай мовах, польскія філолагі, якія вядуць клуб, ведаюць іх усе.

А вось тут ёсць поўны спіс мерапрыемстваў ад хаба — абірайце, што спадабаецца.

Праца

Прастора “Робім разам”

Дзе гэта: Варшава, plac Konstytucji, 6

Дапамагаюць уладкавацца на працу ў арганізацыі, якія займаюцца аховай, даюць рэкамендацыі.

Асацыяцыя  беларускіх  добраахвотнікаў

Акумулююць вакансіі, якія адкрывае ў Польшчы беларускі бізнес. Прэферэнцый для добраахвотнікаў падчас прыёму не працу няма, людзі з баявым досведам трапляюць на гутаркі "інкогніта".

Псіхалагічная дапамога

Partyzanka

Тут абяцаюць псіхалагічную падтрымку і іншыя віды дапамогі, неабходныя для паспяховай адаптацыі і інтэграцыі.

“Ланка”

Гэта рэабілітацыйны цэнтр, у якім дапамагаюць ваенным і ветэранам. Ён знаходзіцца пад Кіевам, і лепш звярнуцца па дапамогу, пакуль вы яшчэ ва Украіне. Але калі патрэбу ў дапамозе вы адчулі ўжо пасля ад'езду, усё адно пішыце — вам паспрабуюць знайсці псіхолага, які можа працаваць анлайн.

Асацыяцыя  беларускіх  добраахвотнікаў

Вам знойдуць псіхолага-валанцёра з ліку тых, хто працуе з ахвярамі рэпрэсій беларускага рэжыму.

Free  Belarus Center

Free Belarus Center прапануе да 10 кансультацый псіхолага бясплатна. Групавыя псіхалагічныя афлайн-трэнінгі ладзяцца ў каворкінгу FBC у Варшаве. Калі вы хочаце атрымаць псіхалагічную дапамогу, запоўніце гэтую форму.

Моладзевы  хаб

Тут ёсць закрытыя сустрэчы з псіхолагам і адкрытыя лекцыі псіхолагаў. Абяцаюць псіхалагічную разгрузку праз творчасць. Шукайце ў раскладзе хаба.

Служба  псіхасацыяльнай  падтрымкі сем'яў  ваенных

Як пазваніць? +48226022512. Ваенныя і ветэраны (у некаторых выпадках — і іх блізкія) могуць звяртацца на ўкраінскія гарачыя лініі псіхалагічнай дапамогі. Патэлефанаваць можна з Польшчы на польскі нумар тэлефона.

Фізічнае здароўе

Е-здароўе

 Вы можаце атрымаць кансультацыю доктара анлайн (бясплатна).

Кансультацыя юрыста Цэнтра беларускай салідарнасці

А яшчэ вы можаце патэлефанаваць на гарачую лінію ЦБС, і вам растлумачаць, што рабіць, калі захварэў у Польшчы. Як аформіць страхоўку? Дзе знайсці бясплатную дапамогу, калі грошай на страхоўку няма? Тэлефануйце, кантакты тут.

Фінансавая дапамога

BySol

Проста цяпер адкрыты збор на дапамогу ў адаптацыі для беларускага добраахвотніка "Ціхага". Мы падрабязна расказвалі яго гісторыю тут.

Хуткая  ўзаемадапамога

Вашу заяўку праверыць каманда валанцёраў і вызначыць памер збору.

Забавы

Моладзевы хаб

Дзе гэта: Варшава, ul. Dożynkowa 6A

Пляцоўку стваралі для таго, каб дапамагаць беларусам знаходзіць адно аднаго і каб было прасцей адаптавацца да новага жыцця за мяжой. Большасць мерапрыемстваў бясплатныя.

— Калі вы прыехалі ў Польшчу і ў вас нікога няма ў Варшаве — можаце проста прыйсці да нас і пазнаёміцца з іншымі беларусамі, — распавядае нам Алесь Лапко.

Можаце пагуляць у клубе "Што? Дзе? Калі?" або напісаць ліст палітвязню. Лісты палітвязням падтрымліваюць не толькі зняволеных, але і тых, хто іх піша. Ужо аформіўся своеасаблівы сацыяльны клуб, падключайцеся.

Нагадваем, што вось тут можаце паглядзець поўны каляндар мерапрыемстваў хаба.

Прастора “Робім разам”

Дзе гэта: Варшава, plac Konstytucji, 6

Напрыклад, 24 сакавіка, тут адкрылася выстава арыгінальных карцін загінулага ў беларускай турме мастака Алеся Пушкіна.

Музей  вольнай Беларуси

Дзе гэта: Варшава, вул. Foksal, 11

Сачыце за мерапрыемствамі музея ў Інстаграме.

У Польшчы ёсць вялікая сетка беларускіх арганізацый. Каб вы не заблыталіся, многія з іх аб'ядналіся ў belarusam.pl, вы можаце знайсці іх на сайце.