Індывідуальныя прадпрымальнікі заявілі, што гатовыя распачаць страйк
Індывідуальныя прадпрымальнікі выказалі недавер Міністэрству па падатках і зборах Беларусі. Яны ўсклалі на яго адказнасць за наступствы ў сферы прадпрымальніцтва, выкліканыя дзеяннем прэзідэнцкага ўказа № 222. Пра гэта гаворыцца ў выніковай рэзалюцыі ўдзельнікаў форуму ІП, які прайшоў у Мінску 3 кастрычніка. Арганізавала мерапрыемства рэспубліканскае грамадскае аб'яднанне "Перспектыва".
У працы форуму, які адбыўся ў Доме Масквы, узялі ўдзел больш за 180 чалавек з розных рэгіёнаў краіны. Прысутнічалі і прадстаўнікі Мінэканомікі, Міністэрства антыманапольнага рэгулявання і гандлю.
Прадпрымальнікі вырашылі пачаць падрыхтоўку да правядзення чарговага форуму, прызначанага на снежань 2016 года. На яго яны збіраюцца запрасіць прэм'ер-міністра. Таксама было абвешчана пра гатоўнасць пачаць страйк і арганізаваць серыю мітынгаў. Але "ў межах закону" і толькі ў тым выпадку, калі кантрольна-наглядныя органы стануць праводзіць масавыя праверкі індывідуальных прадпрымальнікаў з канфіскацыямі і штрафамі, паведамляе БелаПАН.
Старшыня "Перспектывы" Анатоль Шумчанка мяркуе, што на сённяшні дзень галоўная праблема ў сферы малога бізнесу заключаецца ў адсутнасці даверу паміж уладамі і прадпрымальнікамі. Паводле яго слоў, ІП "не ўпэўненыя ў заўтрашнім дні, асабліва што да суправаджальных дакументаў, якія яны паказваюць дзяржаўным органам ўжо на працягу года".
Як паведамляла Еўрарадыё, з пачатку 2016-га ў Беларусі дзейнічае ўказ кіраўніка дзяржавы № 222 аб прадпрымальніцкай дзейнасці. З-за яго патрабаванняў першыя некалькі месяцаў года была фактычна паралізаваная праца ІП, якія гандлююць прадукцыяй лёгкай прамысловасці, бо яны могуць гандляваць толькі тымі таварамі, увезенымі з краін Мытнага саюза, на якія ў іх ёсць суправаджальныя дакументы. Іх атрыманне складанае з-за паліцыі расійскіх партнёраў. Спробы індывідуальных прадпрымальнікаў знайсці паразуменне ва ўладаў былі безвыніковымі. У канцы сакавіка большасць ІП былі вымушаныя аднавіць працу, нягледзячы на рызыку быць аштрафаванымі і пазбаўленымі тавару з-за прэтэнзій дзяржорганаў адносна сапраўднасці суправаджальных дакументаў.
