Макей: на пашырэнне санкцый адкажам ЕС "адэкватна" і "адчувальна"

У Мінску ўсур'ёз успрынялі гэтую інфармацыю. На сённяшняй нарадзе Лукашэнка з прыкрасцю ці са злосцю сказаў: "Супраць нас зноў ўводзяць санкцыі". Відаць, гэта была адна з асноўных тэмаў абмеркавання.

"Будзьце ўпэўненыя, што гэтыя ініцыятывы ў выпадку іх прыняцця нашымі еўрапейскімі партнёрамі не застануцца без адказу, — цытуе словы Макея БЕЛТА. — Рэакцыя будзе сапраўды адэкватнай і вельмі адчувальнай для нашых еўрапейскіх партнёраў".

Макей адзначыў, што меры ў адказ будуць зроблены "ў Беларусі". Але толькі ў выпадку, калі Еўрасаюз вырашыць перайсці ад персанальных санкцый (цяпер у "чорным спісе" 55 чалавек) да эканамічных.

Таксама міністр адзначыў, што не Беларусь з'яўляецца ініцыятарам гэтай сітуацыі. "Мы толькі стараліся, як нам здаецца, адэкватна рэагаваць на тыя выклікі, з якімі сутыкнулася і сутыкаецца Беларусь", — заўважае Уладзімір Макей.

У Мінску пагражаюць Бруселю адказам і зусім не асвятляюць прычыну магчымага пашырэння санкцый. Нават Масква звярнула ўвагу на жорсткасць беларускіх сілавікоў у дачыненні мірных пратэстоўцаў.