Мінабароны Літвы выказалася пра расійскую ваенную базу ў Беларусі
Міністэрства абароны Літвы выказалася пра расійскую ваенную базу ў Беларусі. У Вільні мяркуюць, што яе з'яўленне пагоршыць дачыненні з Літвой, пашкодзіць нармалізацыі адносін Мінска з NАТО і Еўрасаюзам.
"Не падлягае сумневу, што з'яўленне новай расійскай ваеннай базы на тэрыторыі Беларусі небяспечнае дадатковай напружанасцю ў нашым рэгіёне і негатыўным уплывам на літоўска-беларускія адносіны. Гэта таксама перашкодзіць імкненню Беларусі нармалізаваць адносіны з ЕС і NАТО", — цытуе словы літоўскага міністра абароны Ёзаса Олекаса Радыё Свабода.
Кіраўнік Мінабароны Літвы пракаментаваў указанне прэзідэнта Расіі Уладзіміра Пуціна міністэрствам абароны і замежных спраў РФ правесці перамовы з Беларуссю аб стварэнні базы Ваенна-паветраных сілаў (здарылася гэта пасля сустрэчы ў Сочы Лукашэнкі і Пуціна).
Олекас таксама звярнуў увагу на тое, што афіцыйны Мінск пакуль не апублікаваў сваю пазіцыю па гэтым пытанні.
Фота: ria.ru
