Пад Віцебскам на аўтаспаборніцтвах гоншчык збіў суддзяў
На аўтаспаборніцтвах пад Віцебскам гоншчык збіў суддзяў. Як паведамляе прэс-служба УУС Віцебскага аблвыканкама, здарэнне адбылося сёння, 21 кастрычніка на трасе ў Тулаве.
Удзельнік аўтакросу на баггі выехаў на закругленне трасы і там не справіўся з кіраваннем. Аўтамабіль выкінула на ўзвышша, дзе стаялі суддзі гонкі.
Пацярпелі два чалавекі — іх даставілі ў лякарню з пераломамі рознай ступені цяжкасці. Ніхто з гледачоў ды іншых гоншчыкаў не пацярпеў.
На месцы здарэння працуе Следчы камітэт, які дасць прававую ацэнку інцыдэнту.
