Падаўжэнне санкцый ЕС супраць Беларусі і Расіі блакуе Венгрыя

Венгрыя хоча заблакаваць падаўжэнне еўрапейскіх санкцый супраць Беларусі і Расіі. Пра гэта ў Вашынгтоне заявіў кіраўнік МЗС Венгрыі Петэр Сіярта, перадае HirTV. Пытанне павінна абмяркоўвацца на пасяджэнні Рады ЕС 24 лютага.

Сіярта паведаміў, што многія еўрапейскія палітыкі хочуць працягу вайны і штурхаюць у гэтым кірунку ўкраінскага прэзідэнта Уладзіміра Зяленскага.

Таксама ён сказаў, што венгерскія ўлады адчуваюць моцны ціск для падаўжэння санкцый, накіраваных супраць Беларусі і Расіі. Тэрмін дзеяння цяперашніх санкцый заканчваецца 15 сакавіка, а рашэнне аб іх падаўжэнні трэба прыняць да 10 сакавіка. Сіярта дадаў, што Венгрыя 24 лютага не пагодзіцца на паўгода падоўжыць санкцыі супраць грамадзян Беларусі і Расіі.

На думку кіраўніка венгерскай дыпламатыі, да 10 сакавіка яшчэ ёсць час і яго трэба выкарыстаць для амерыкана-расійскіх перамоваў. Сіярта заклікаў пазбягаць рашэнняў, якія могуць перашкодзіць паспяховаму выніку гэтых перамоваў.

Акрамя таго, Венгрыя выступіла супраць прапанаванага ЕС пакета дапамогі для Украіны ў памеры 20 мільярдаў еўра. Прычынай назвалі тое, што гэтыя грошы накіраваныя на ўмацаванне пазіцыі Кіева на перамовах, а не на дасягненне міру.

Еўрасаюз падаўжае санкцыі супраць Расіі кожныя шэсць месяцаў, для гэтай пастановы патрабуецца падтрымка ўсіх краін-удзельніц. Цяперашняе падаўжэнне Венгрыя адкладае ад снежня 2024 года, спырша спасылаючыся на інаўгурацыю прэзідэнта ЗША Дональда Трампа. Потым прэм'ер-міністр Венгрыі Віктар Орбан выказаўся за блакаванне санкцый і заклікаў ЕС націснуць на Украіну, каб яна аднавіла транзіт расійскага газу ў Еўропу. Аднак у студзені 2025-га Венгрыя перастала выступаць супраць падаўжэння санкцый, атрымаўшы гарантыі энэергабяспекі з боку Еўрасаюза.