Палітвязня Ярашука абвінавацілі ў закліках да санкцый, супраць якіх ён выступаў
Аляксандр Ярашук / https://www.facebook.com/BelarusianCongressOfDemocraticTradeUnions
Аляксандру Ярашуку выставілі новае абвінавачванне — заклікі да санкцый. Яму пагражае ад 4 да 12 гадоў пазбаўлення свабоды, піша "Народная воля" са спасылкай на свае крыніцы. Кіраўнік Беларускага Кангрэсу дэмакратычных прафсаюзаў (ліквідаваны Вярхоўным судом РБ) знаходзіцца за кратамі з красавіка 2022 года, у траўні прызнаны праваабаронцамі палітвязнем. Спачатку яго абвінавачвалі ў "арганізацыі і падрыхтоўцы дзеянняў, што груба парушаюць грамадскі парадак, альбо актыўным удзеле ў іх".
Выданне нагадвае пра тое, што Ярашук публічна адкрыта выступаў супраць увядзення жорсткіх санкцый у дачыненні Беларусі, з-за чаго стаў аб'ектам крытыкі з боку апазіцыі. Аднак сілавікі знайшлі ў яго камп'ютары нейкую крамолу, якая пацягнула на цэлы новы крымінальны артыкул.
Мяркуецца, што крымінальную справу будуць разглядаць у Мінскім гарадскім судзе, дата яшчэ невядомая. Па ёй таксама праходзяць намеснік Аляксандра Ярашука Сяргей Антусевіч і бухгалтар Ірына Бут-Гусаім.
