Пяць беларусаў атрымалі ліцэнзіі для Алімпіяды-2024
Алімпіяда / pexels.com
Пяць беларусаў і шэсць расіян атрымалі ліцэнзіі для ўдзелу ў Алімпійскіх гульнях 2024 года ў Парыжы. Пра гэта паведамляецца ў абноўленым рэлізе Міжнароднага алімпійскага камітэта (МАК).
Вядома, што ліцэнзіі атрымалі Ванэса Каладзінская (жаночая барацьба), Абубакар Аслаханаў (грэка-рымская барацьба), Анастасія Шкурдай (плаванне), Яўген Залаты (веславанне).
8 снежня МАК дазволіў беларускім і расійскім спартоўцам удзельнічаць у Алімпіядзе ў нейтральным статусе.
Праўда, першапачаткова ў прэс-рэлізе была памылка: там гаварылася, што допуск атрымалі восем расіян і тры беларусы.
Алімпіяда ў Парыжы пройдзе з 26 ліпеня па 11 жніўня 2024 года.
Санкцыі супраць спартоўцаў з Расіі і Беларусі былі ўведзеныя пасля пачатку шырокамаштабнага расійскага ўварвання ва Украіну. Пры гэтым выкарыстоўвалася і тэрыторыя Беларусі.
Ва Украіне не пагаджаюцца з рашэннем МАК дапусціць беларускіх і расійскіх спартоўцаў да ўдзелу ў Алімпіядзе — нават у нейтральным статусе. У Мінску таксама выказалі незадавальненне рашэннем МАК.
