Рэжым Лукашэнкі баіцца праваабаронцаў — Джулі Фішэр пра закрыццё НДА
Джулі Фішэр
Рэжым Аляксандра Лукашэнкі бачыць пагрозу ў дзейнасці праваабаронцаў, лічыць прызначаны амбасадар ЗША ў Беларусі Джулі Фішэр. Яна пракаментавала ў Twitter закрыццё апошніх праваабарончых арганізацый.
5 кастрычніка Вярхоўны суд ліквідаваў праваабарончую арганізацыю "Прававая ініцыятыва". І ў той жа дзень Мінскі гарадскі суд прыняў рашэнне пра закрыццё праваабарончай арганізацыі "Звяно". Прадстаўнікі "Звяна" маюць намер абскардзіць гэтае рашэнне. Гэта апошняя няўрадавая праваабарончая арганізацыя, якая засталася ў Беларусі.
"Рэжым зняў з рэгістрацыі апошнюю праваабарончую няўрадавую арганізацыю ў Беларусі, 1 з 275 закрытых з ліпеня", — піша Джулі Фішэр.
Такое стаўленне да праваабаронцаў на фоне злоўжыванняў і жалезнай хваткі ў прававой сістэме паказвае, што ўлада разумее рэальную пагрозу. Яна разумее, "што рэальная пагроза зыходзіць ад тых, хто вядзе хроніку нападаў на грамадзян Беларусі", мяркуе дыпламат.
The regime has deregistered Belarus’s last human rights NGO, 1 of 275 NGOs closed since July. Amidst their abuses and iron grip on the legal system, this shows they perceive the real threat is from those who chronicle the assault against the citizens of Belarus. #StandWithBelarus
— Julie Fisher (@USAmbBelarus) October 6, 2021
Джулі Фішэр планавала прыбыць у Мінск у студзені. Але да гэтага часу не можа атрымаць візу.
У лютым яна наведала Вільню і Варшаву. Гэта не спадабалася беларускім уладам. Кіраўнік МЗС РБ Уладзімір Макей, каментуючы тую паездку, заявіў, што ў Мінску хацелі б бачыць амерыканскага амбасадара, але калі ў Джулі Фішэр "ёсць нейкія прадузятасці, звязаныя з уручэннем даверчых грамат, то трэба падумаць яшчэ". Пазней ён яшчэ раз вярнуўся да сітуацыю, удакладніў, што, калі дыпламат "збіраецца прыехаць і рабіць заявы аб нелегітымнасці рэжыму, то які сэнс тады рабіць гэта".
