Са Слонімскай лякарні эвакуявалі 78 чалавек (фота)
Увечары 26 траўня верхнія паверхі галоўнага корпуса Слонімскай цэнтральнай раённай лякарні пачало затапліваць.
Як піша "Газета Слонімская", прычынай надзвычайнага становішча стала моцная залева. Ад яе і ад дэфармацыі кранштэйнаў ліўневай каналізацыі галоўнага корпуса лякарні вада заліла 4-ы і 5-ы паверхі кардыялагічнага аддзялення.
На момант здарэння ў галоўным корпусе было 145 хворых, у тым ліку ў кардыялагічным аддзяленні — 58, у тэрапеўтычным — 40, неўралагічным — 47 чалавек.
Выратавальнікі разам з персаналам эвакуявалі 78 хворых. Іх часова размясцілі ў траўматалагічным, хірургічным і вочным аддзяленнях лякарні. Дадому былі выпісаныя 53 чалавекі (33 з кардыялагічнага і 20 з тэрапеўтычнага аддзяленняў). Цяжкіх хворых няма. Галоўны корпус лякарні абясточылі.
Фота — gs.by
