Што рабіць і куды звяртацца, калі беларус памёр у Польшчы?

12/03/2024 - 09:24

Што рабіць, калі чалавек памірае ў Польшчы?

Што рабіць, калі чалавек памірае ў Польшчы? / pixabay.com

У Польшчы пражывае каля 300 тысяч беларусаў. Многія пераехалі сюды вымушана праз палітычныя рэпрэсіі і пераслед. Некаторыя прывезлі з сабой цэлыя сем'і і ўжо наладзілі сваё жыццё ў суседняй краіне.

Але што рабіць, калі, не дай бог, жыццё абрываецца? Еўрарадыё паразмаўляла з юрыстамі Цэнтра беларускай салідарнасці на не самую радасную тэму і даведалася, куды звяртацца і бегчы, калі ваш знаёмы ці сваяк памірае ў Польшчы.

Званіць 112

Калі вам усё ж давялося тварам у твар сутыкнуцца з такой праблемай, перш за ўсё, раяць юрысты, трэба патэлефанаваць на нумар экстранай дапамогі 112 і выклікаць доктара для пацверджання смерці. У выпадку, калі вы западозрылі гвалтоўную смерць, неабходна выклікаць і паліцыю па гэтым жа нумары тэлефона. Калі смерць наступіла ў выніку злачынства, прызначаецца ўскрыццё.

Пасля гэтага паспрабуйце звязацца з блізкімі сваякамі памерлага.

На падставе дакумента аб смерці, выдадзенага доктарам (karta zgonu), неабходна цягам трох дзён з'явіцца ў ЗАГС па месцы смерці і падаць заяву аб выдачы пасведчання аб смерці (akt zgonu).

Заяву можа падаць толькі член сям'і, для гэтага трэба паказаць дакумент аб смерці ад доктара, пашпарт памерлага і пашпарт заяўніка.

На падставе копіі пасведчання аб смерці і дакумента, які пацвярджае сваяцтва з памерлым, сваякам у паскораным парадку могуць адкрыць візу. Для атрымання візы на паездку ў Польшчу на пахаванне роднага трэба звярнуцца ў найбліжэйшае консульства.

Калі хаваць у Польшчы

Калі памерлага вырашылі хаваць у Польшчы, юрысты ЦБС рэкамендуюць звязацца з прыватнай пахавальнай кампаніяй і абмеркаваць з ёй усе дэталі, у тым ліку спосаб пахавання.

Пры ўмове, што чалавек працаваў у Польшчы і быў застрахаваны ў ZUS (Zakład Ubezpieczeń Społecznych, або Упраўленне сацыяльнага страхавання), яго сваякам належыць не больш за 4000 злотых у якасці дапамогі на пахаванне. Калі ж такой страхоўкі не было, усе выдаткі бярэ на сябе сям'я памерлага.

Польскія ўлады абавязаныя праінфармаваць пра тое, што здарылася, сям'ю грамадзяніна Беларусі, калі ён быў у Польшчы адзін.

У выпадку, калі іншаземец не меў міжнароднай абароны або не падаў заяву на міжнародную абарону, Польшча абавязаная, у адпаведнасці з двухбаковай дамовай, паведаміць беларускаму консулу пра смерць грамадзяніна гэтай краіны і даць яму копію пасведчання аб смерці.

Калі ў памерлага не было сваякоў, пахаванне павінна арганізаваць гміна, дзе быў зафіксаваны факт смерці. У такой сітуацыі пахаванне ладзіцца за кошт гміны, памерлага хаваюць на могілках.

Нярэдка, тлумачаць юрысты ЦБС, стараста гміны можа дазволіць выкарыстаць цела ў навучальных мэтах, напрыклад, для ўскрыцця ў медыцынскім універсітэце, калі няма пярэчанняў, напрыклад, ад консула.

Калі хаваць у Беларусі

Калі сваякі памерлага вырашылі праводзіць пахаванне ў Беларусі, то неабходна патэлефанаваць у беларускае консульства і атрымаць там кансультацыю.

Непасрэдна транспартаваннем цела займаюцца пахавальныя кампаніі. З дакументаў спатрэбяцца даведка ад кіраўніка могілак, дзе будзе пахаваны іншаземец, дазвол польскай санітарна-эпідэміялагічнай станцыі для перавозкі цела, а таксама дазвол беларускага консула.

Калі чалавек у Польшчы быў сацыяльна застрахаваны, сваякам выплачваецца 4000 злотых на пакрыццё транспартных выдаткаў.